ბილბორდ საქართველოს მკითხველმა მუსიკოსი ნიკა გოგიაშვილი მაშინ გაიცნო, როდესაც მან wayward.atom-ის პროექტის ფარგლებში სადებიუტო სოლო ალბომი, True Bypass გამოსცა. მაგდა ივანიშვილს კი მსმენელი მუსიკალური პროექტებიდან იცნობს. მათ შორის გამორჩეული პროექტია The Voice, როდესაც მომღერალმა პირველი ადგილი დაიკავა და მეგაშოუს გამარჯვებული გახდა.
20 იანვარს wayward.atom-ის (ნიკა გოგიაშვილი) და მაგდა ივანიშვილის პირველი ერთობლივი კოლაბორაცია გამოქვეყნდა, სახელწოდებით Love is like Reversed ADSR.
wayward.atom- (ნიკა გოგიაშვილი) – მუსიკოსი
„ეს ტრეკი თავიდან ინსტრუმენტალური იყო, ვოკალზე არც მიფიქრია მანამდე. რაღაც მომენტში მაგდა იყო ჩემთან და, რომ მოვასმენინე, გაგიჟდა, გადაირია და ესე შედგა wayward.atom-ის ფარგლებში ჩვენი პირველი კოლაბორაცია. მე და მაგდა დიდი ხანია ერთმანეთს ვიცნობთ და ჩემთვის ძალიან დიდი კომფორტია მასთან მუშაობა. ის თავისი საქმის უმაღლესი დონის პროფესიონალია, ამიტომ სასიამოვნო და კომფორტული იყო ის პროცესი, რაც ერთად გავიარეთ.”
მუსიკალური კლიპის რეჟისორი ეკა დარსაველიძეა. ნიკას თქმით, რეჟისორის ეს ნამუშევარი მუსიკის ვიზუალიზაციას იდეალურად გადმოსცემს და ჰარმონიულად ერწყმის მუსიკას.
„რაც შეეხება მუსიკალურ ვიდეოს, მასზე იმუშავა ეკა დარსაველიძემ, რომელიც ჩემი ძალიან ახლო მეგობარია. ეს არის მეორე მუსიკალური ვიდეო, რომელზეც მასთან ვითანამშრომლე. პრინციპში, მე რა ხედვაც მაქვს მუსიკალური, ვიზუალურ ნაწილში იდეალურად გადმოსცემს ამ ყველაფერს ეკა, ძალიან ლამაზად ხედავს და პირდაპირ ეკას შევთავაზეთ ამ ტრეკის გაკეთება. მას თავიდანვე ძალიან მოეწონა და მერე კონცეფციაზე ერთად ვმუშაობდით.
პირველი კოლაბორაციაა ჩემი, პირველი ნაშრომია, სადაც არ არის მხოლოდ ინსტრუნმენტალი. ვოკალიც იქნება, ჩემი წინა პროექტი, მთელი ალბომი, ექსპერიმენტებზე იყო აგებული, აქ კი არანჟირებაში ამდენი წლის განმავლობაში რა უნარებიც დამიგროვდა, ყველაფერი გამოვიყენე. მსმენელი, ვისაც აინტერესებს არანჟირების დეტალები, თუ დაუკვირდება, ბევრ სიურპრიზს აღმოაჩენს.“
„მე და ნიკა მუდმივად ვაჩვენებდით ხოლმე ერთმანეთს ჩვენს ნამუშევრებს და, როდესაც ეს ტრეკი მაჩვენა, იმდენად მომეწონა, რომ ვუთხარი, მოდი ვცადოთ, სიმღერის სახე მივცეთ და მელოდია დავუწეროთ-მეთქი. მუშაობის პროცესში ბევრი რამ შევცვალეთ, გადავწერეთ, გადმოვწერეთ. იმდენად დაემთხვა ჩვენი გემოვნება, ყველაფერზე უმარტივესად ვთანხმდებოდით და გამოვიდა ის, რაც გამოვიდა. იმდენად კომფორტული იყო ერთმანეთთან მუშაობა, რომ კოლაბორაციებზე მუშაობაც შევთავაზე და დიდი იმედი მაქვს, რომ მალე გამოვუშვებთ შემდეგ სიმღერებსაც.“
მოისმინეთ Wayward Atom & MAGDA – Love Is Like A Reversed ADSR
