კანიე უესტი ქალის ტანისამოსს უბრუნდება. რეპერმა ინსტაგრამზე YZY-ს ქალის ხაზის ნიმუშები გააზიარა. უესტმა პირველად შავი ბოდე წარადგინა, რომელიც ახლახან მის მეუღლეს, ბიანკა სენსორის ეცვა.
პოსტში რეპერმა ყოფილ პარტნიორზე, „ადიდასზეც” ისაუბრა და ბრენდი კიდევ ერთხელ დაადანაშაულა დიზაინების მოპარვაში. „ადიდასმა” უესტთან პარტნიორობა 2022 წლის ოქტომბერში, მუსიკოსის ანტისემიტური განცხადებების შემდეგ გაწყვიტა.
„ადამიანები ცდილობდნენ, ეთქვათ, რომ „ადიდასს” დავბრუნებოდი. რა თქმა უნდა, ეს ის ხალხია, ვინც იმდენად ახლოსაა, რომ ჩემგან ფული ითხოვონ. მათ არ აინტერესებთ ჩემი თავისუფლება ან ხედვა. ახლა კი ჩემი ხედვა ცოცხლდება და ეს ჯონ ვიკის ვენდეტაა ყველა მოდის კომპანიის წინააღმდეგ,” – წერს რეპერი.
Update:
— Ye Streams (@kanyestreams1) January 22, 2025
I LOVE THIS ERA https://t.co/aa3v2Vudur pic.twitter.com/bYK7lH8lEV
ეს კანიესგან ქალის ტანსაცმლის გამოშვების პირველი მცდელობა არ არის. პირველი კოლექცია მან 2011 წელს შექმნა, რომლის ჩვენებაც პარიზის მოდის კვირეულზე შედგა.
უესტი ასევე აქტიურად უშვებს ფეხსაცმლის ახალ მოდელებს. მან ახლახან გამოუშვა მამაკაცის SL-01 მოდელი, რომლის შეძენაც YZY ვებგვერდზეა შესაძლებელი და დააანონსა BL-01 სპორტული ფეხსაცმელი, რომელიც ჯერ არ იყიდება.
რაც შეეხება მუსიკალურ მხარეს, ბოლო დროს უესტი აქტიურად აანონსებს სოლო ალბომს Bully, რომელზეც პროდიუსერ მაიკ დინთან ერთად მუშაობს.
