სტინგი მომდევნო რამდენიმე კონცერტს აუქმებს, სანამ ყელის დროებითი ინფექციისგან გამოჯანმრთელდება. მუსიკოსმა ამის შესახებ განცხადება სოციალურ ქსელში გაავრცელა.
ინსტაგრამის პოსტში სტინგის გუნდი წერს, რომ ექიმის რეკომენდაციით 23 იანვარს მისი Bass Magazine Awards-ზე გამოსვლა, ასევე 24 და 26 იანვრის კონცერტები გაუქმდება. აღნიშნული კონცერტები 28 მაისსა და პირველ ივნისს გადაიდო. „სტინგი გულწრფელ ბოდიშს გიხდით შექმნილი დისკომფორტისთვის და მადლიერია თანაგრძნობისთვის,” – ვკითხულობთ პოსტში.
მომდევნო დღეს კი მუსიკოსმა პირადად მიმართა გულშემატკივრებს: „თანდათან ვაღწევ თავს ყელის დროებით ინფექციას, რომლის გამოც ვერ ვმღერი. მადლობა კეთილი სურვილებისთვის. ერთი სული მაქვს, განვაგრძო სიმღერა და დავბრუნდე გადადებულ შოუებზე.”
არსებული ინფორმაციით, სტინგს კვლავ ელიან ბილი აილიშთან, ოლივია როდრიგოსთან, ლედი გაგასა და სხვა ვარსკვლავებთან ერთად FireAid-ის საქველმოქმედო კონცერტზე ლოს-ანჯელესში, რომელიც ტყის ხანძრის შედეგად დაზარალებულთა მხარდასაჭერად 30 იანვარს იმართება.
ამჟამად მუსიკოსი Sting 3.0 ტურნეში იმყოფება. 8 თებერვალს ინდიანაპოლისში ბილი ჯოელთან ერთობლივი გამოსვლის შემდეგ ის ლათინურ ამერიკაში გაემგზავრება და პირველ კონცერტს 14 თებერვალს რიო-დე-ჟანეიროში გამართავს.
ნახეთ სტინგის პოსტები:
