კლუბი Mtkvarze განცხადებას აქვეყნებს, რომელშიც მიმდინარე პროტესტს ეხმიანება და დაკავებული მოქალაქეების გათავისუფლებას მოითხოვს. პოსტი ასევე ეხმიანება ონლაინ გამოცემების – „ნეტგაზეთისა” და „ბათუმელების” დამფუძნებლის, მზია ამაღლობელის პატიმრობას.
„სიძულვილზე დაფუძნებული, ძალაუფლებისა და ფინანსური ინტერესების შესანარჩუნებლად წარმართული პოლიტიკის ფონზე, უკვე 63 დღეა, თბილისის ქუჩებში პროტესტის ხმა არ წყდება. საპროტესტო ტალღა მოედო ყველა სფეროს და არნახული გამოხატვის მრავალფეროვნებით, ყოველდღიურად ჯიუტად მოვითხოვთ რეჟიმის მიერ დატყვევებული თანამოქალაქეების გათავისუფლებას და ხელახალ საპარლამენტო არჩევნებს.
სოლიდარობას ვუცხადებთ უსამართლო სასამართლოს მიერ დატყვევებულ ყველა უდანაშაულო მოქალაქეს, რომლებიც ქვეყნის მომავლის გადარჩენისთვის ბრძოლაში რეჟიმმა საპყრობილეში გამოკეტა.
თავისუფლება მზია ამაღლობელს და ყველა იმ თანამებრძოლს, ვისაც უსამართლოდ წაართვეს თავისუფლება!” – წერია ინსტაგრამზე გამოქვეყნებულ პოსტში.
მზია ამაღლობელი 2025 წლის 11 იანვარს დააკავეს. ბათუმის პოლიციის უფროსის, ირაკლი დგებუაძისათვის სილის გაწვნის გამო მზია ამაღლობელის წინააღმდეგ გამოძიება სისხლის სამართლის კოდექსის 353-ე პრიმა მუხლის პირველი ნაწილით დაიწყო, რაც პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე ანდა საჯარო დაწესებულებაზე თავდასხმის ბრალდებას გულისხმობს. დაკავებულს 4-დან 7 წლამდე თავისუფლების აღკვეთა ემუქრება. მედიის ინფორმაციით, მზია ამაღლობელი მე-18 დღეა შიმშილობს.
