ბიონსეს ალბომმა – Cowboy Carter 2025 წლის გრემის დაჯილდოებაზე წლის ალბომის ჯილდო მოიპოვა. მუსიკოსისათვის ისტორიული საღამო აღმოჩნდა – ბიონსემ წლის ალბომის კატეგორიაში თავისი პირველი გამარჯვება აღნიშნა. ამგვარად, ბიონსე გახდა პირველი შავკანიანი ქალი ამ საუკუნეში, რომელმაც წლის ალბომის გრემი წამყვანი არტისტის სტატუსით მოიპოვა. გამარჯვებულს გრემი ლოს-ანჯელესის სახანძრო დეპარტამენტის წარმომადგენლებმა გადასცეს.
„მინდა, მადლობა გადავუხადო და პატივი მივაგო მეხანძრეებს, რომლებიც ჩვენი უსაფრთხოების დაცვაზე ზრუნავენ,“ – ამ სიტყვებით დაიწყო ბიონსემ თავისი ემოციური გამოსვლა ლოს-ანჯელესის Crypto.com Arena-ზე. „სრულიად მომიცვა ამ ემოციამ, დიდი პატივია ეს აღიარება. ამასობაში, ძალიან, ძალიან ბევრი წელი გავიდა.“
ამის შემდეგ, ბიონსემ უკვე აუდიტორიას მიმართა: „მადლობას ვუხდი აკადემიას, სიმღერების ყველა ავტორს; ყველას, ვისთანაც კოლაბორაცია მქონდა, პროდიუსერებს გაწეული შრომისთვის. ამ ჯილდოს [ლინდა] მარტელს ვუძღვნი. იმედია, სვლას გავაგრძელებთ და კიდევ მეტ კარს შევაღებთ.“
ბიონსესთვის ეს გამარჯვებებით დატვირთული საღამო იყო – Cowboy Carter-მა საუკეთესო ქანთრი ალბომის ჯილდოც მოიპოვა, რაც მას პირველ შავკანიან ქალად აქცევს, ვინც ამ კატეგორიაში გრემი აიღო. გარდა ამისა, მან გაიმარჯვა საუკეთესო ქანთრი დუო/ჯგუფის შესრულების კატეგორიაშიც სიმღერით – II Most Wanted”, რომელიც მაილი საირუსთან ერთად ჩაწერა.
ბიონსე გრემის ცერემონიაზე ყველაზე მეტი – 11 ნომინაციით წარდგა. Cowboy Carter აპრილში გამოვიდა და ორი კვირის განმავლობაში Billboard 200-ს ლიდერობდა. ეს ბიონსეს მერვე ალბომია, რომელმაც ჩარტის პირველი ადგილი დაიკავა. აღსანიშნავია, რომ გრემის დაჯილდოებამდე, ბიონსემ Cowboy Carter Tour-ის თარიღებიც დააანონსა.
