კენდრიკ ლამარი ლიდერის პოზიციას კვლავაც ინარჩუნებს. რეპერის ჰიტმა, სახელწოდებით Not Like Us, 2025 წლის გრემის დაჯილდოებაზე წლის ჩანაწერის ჯილდო აიღო. ტრეკი, რომელიც Drake-თან მის დაპირისპირებას ასახავს, გრემის ოთხი მთავარი ჯილდოდან ერთ-ერთის მფლობელი გახდა.
სცენაზე ასვლისას, ლამარს დრეიკი არ უხსენებია. მან ღმერთს მადლობას გადაუხადა და თავისი დეიდა გაიხსენა, რომელიც დაჯილდოების წინა დღეს გარდაიცვალა: „ალბათ, ახლა ზემოდან გვიყურებს, ამიტომ ყველას მინდა გთხოვოთ, რომ გაიღიმოთ და მასაც სიხარული აგრძნობინოთ,“ – განაცხადა არტისტმა.
ლამარმა სცენიდან ასევე მადლობა გადაუხადა Dr. Dre-სა და Swizz Beatz-ს, რომლებიც გრემის ცერემონიას ესწრებოდნენ და მისი არაერთი ტრეკის პროდიუსერები არიან. თავისი გამარჯვება ჰიპ-ჰოპ არტისტმა ლოს-ანჯელესს მიუძღვნა – ქალაქს, რომელიც დამანგრეველმა ხანძრებმა მძიმედ დააზარალა.
„ამ ჯილდოს ქალაქს ვუძღვნი – კომპტონს, უოთსს, ლონგ ბიჩს, ინგლვუდს, ჰოლივუდს… ეს ჩემი უბანია, რომელიც ყოველთვის მხარს მიჭერდა, პატარა ვიყავი თუ ზრდასრული… ვერასდროს გამოვხატავ საკმარის მადლიერებას იმ ადგილების მიმართ, რომლებსაც სკოლიდან დაბრუნებისას გავდიოდი. მაგრამ ყველაზე მნიშვნელოვანი რაც არის, [ჯილდოს] იმ ხალხს და ოჯახებს ვუძღვნი, რომლებიც პალისეიდსის რაიონსა და ალტადენაში ცხოვრობენ. ეს გამარჯვება ნათელი დასტურია იმისა, რომ ჩვენ შეგვიძლია ამ ქალაქის აღდგენა,“ – თქვა ლამარმა.
ამ კატეგორიაში გამარჯვებულის პროგნოზირება რთული იყო, რადგან ლამარის კონკურენტები საკმაოდ ძლიერები იყვნენ. ნომინაციაში კენდრიკ ლამარის Not Like Us-თან ერთად წარდგენილი იყო: Now and Then (The Beatles), Texas Hold ‘Em (ბიონსე), Espresso (საბრინა კარპენტერი), 360 (Charli XCX), Birds of a Feather (ბილი აილიში), Good Luck, Babe! (ჩაპელ როუნი) და Fortnight (ტეილორ სვიფტი და Post Malone).
