გრემის დაჯილდოების 67-ე ყოველწლიურ ცერემონიაზე ლედი გაგამ ახალი საცეკვაო სინგლი Abracadabra და მხატვრული მუსიკალური ვიდეოკლიპი წარადგინა. „კატეგორია არის: ცეკვა ან სიკვდილი,“ — ასე აცხადებს ლედი გაგამ ვიდეოს დასაწყისში. ორმოცამდე მოცეკვავე, ლედი გაგას დამახასიათებელი დინამიკა და შთამბეჭდავი კოსტიუმები Abracadabra-ს ვიდეოკლიპს გამორჩეულ, ენერგიულ დატვირთვას სძენს, სადაც ხელოვნების სხვადასხვა ფორმის სინთეზი ხდება.
Abracadabra ლედი გაგას მომავალი ალბომის Mayhem-ის მესამე სინგლია. გასულ ზაფხულს, არტისტმა ბრუნო მარსთან ერთად შექმნილი სინგლი Die With a Smile წარადგინა, რომელიც Billboard Hot 100-ში პირველ ადგილზე გავიდა და გრემის წლის სიმღერისა და საუკეთესო პოპ დუეტის ნომინაცია მოიპოვა. ორი თვის შემდეგ კი, ლედი გაგამ ელექტრონული-პოპ სიმღერა Disease გამოუშვა, რომელიც Billboard Hot 100-ში 27-ე ადგილზე გავიდა.
27 იანვარს ლედი გაგამ დაადასტურა, რომ მისი ახალი სტუდიური ალბომი Mayhem 7 მარტს გამოვა. მიუხედავად იმისა, რომ ეს ალბომი იქნება მისი პირველი ორიგინალური სრული პოპ ალბომი Chromatica-ს შემდეგ, ამ ხნის განმავლობაში ლედი გაგა მუსიკალურად კვლავ აქტიურობდა. 2021 წელს მან ორი გრემის ჯილდო მიიღო. გარდაცვლილ ტონი ბენეტთან ერთად შექმნილი ალბომისთვის Love for Sale, გასულ წელს ჯაზ ალბომების ჩარტში პირველი ადგილი დაიკავა Harlequin-ის საუნდტრეკით.
გასული კვირა ლედი გაგასთვის ძალიან დატვირთული იყო. 30 იანვარს მან FireAid-ის საქველმოქმედო ღონისძიებაში მიიღო მონაწილეობა, სადაც ახალი სიმღერა შეასრულა. მანვე Saturday Night Live-შოუში დაადასტურა, რომ 14 თებერვალს, შოუს 50 წლის იუბილეზე, საღამოს მთავარი არტისტი იქნება, მასთან ერთად მიიღებენ მონაწილეობას ასევე მაილი საირუსი და Bad Bunny. აპრილში კი ლედი გაგა უკვე მეორედ, Coachella-ს მთავარ ჰედლაინერად წარდგება.
ნახეთ ლედი გაგას ახალი მუსიკალური ვიდეოკლიპი Abracadabra.
