The Weeknd-მა გულშემატკივრებს მისი დაანონსებული ფსიქოლოგიური თრილერის პირველი კადრები გაუზიარა. Hurry Up Tomorrow – ასე ჰქვია ფილმს, რომლის პირველი ვიზუალური მასალა არტისტმა 3 თებერვალს გაავრცელა.
ფოტოების ინტერნეტში გავრცელებამდე ერთი დღით ადრე, The Weeknd გრემის სცენაზე მოულოდნელად დაბრუნდა. ამერიკის ხმის ჩამწერი აკადემიისათვის გამოცხადებული ხანგრძლივი ბოიკოტის შემდეგ, 2025 წლის გრემის დაჯილდოებაზე ის მუსიკალური ნომრებით წარსდგა. არტისტმა Cry for Me და Timeless შეასრულა. ამ უკანასკნელი ტრეკის შესრულებისას,
მუსიკოსს სცენაზე Playboi Carti შეუერთდა. ორივე სიმღერა შედის The Weeknd-ის ახალ ალბომში – Hurry Up Tomorrow, რომელიც 31 იანვარს გამოვიდა.
რაც შეეხება ფილმს, რომელიც ალბომის სახელწოდებას იზიარებს – Hurry Up Tomorrow, ტრეი ედვარდ შულცის სარეჟისორო ნამუშევარია. ფილმი გვიყვება მუსიკოსზე, რომელსაც უძილობა ტანჯავს და უცხო ადამიანთან შეხვედრის შემდეგ, ისეთ თავგადასავალში ეხვევა, რომელიც მის ცხოვრებას ცვლის. ფილმში The Weeknd-თან ერთად ჯენა ორტეგა და ბარი კიოგანი მონაწილეობენ.
ფილმისათვის მუსიკა The Weeknd-მა თავის მუდმივ კოლაბორატორთან, დენიელ ლოპატინთან (ცნობილი როგორც Oneohtrix Point Never) ერთად შექმნა. კინოკომპანია Lionsgate ფილმს მსოფლიო მასშტაბით კინოთეატრებში 16 მაისს გაავრცელებს.
ფილმის პროდიუსერი The Weeknd-ის კომპანია Manic Phase და მისი პარტნიორი, რეზა ფაჰიმი არიან. აბელ ტესფაიემ (The Weeknd) სწორედ ფაჰიმთან ერთად იმუშავა HBO-ს 2023 წლის სერიალზე – The Idol, რომლის რეჟისორი სემ ლევინსონია. ფილმის პროდიუსერებს შორის არიან გარდაცვლილი კევინ ტურენი და ჰარისონ კრაისი. პროექტის აღმასრულებელი პროდიუსერების ჩამონათვალშია ამავდროულად ფილმის მთავარი როლის შემსრულებელი ჯენა ორტეგა.
იხილეთ ფოტოები:
