მძიმე მეტალის ჟანრის პიონერმა ოზი ოსბორნმა განაცხადა, რომ სიარული აღარ შეუძლია. მუსიკოსმა ეს განცხადება მაშინ გაავრცელა, როცა თავისი ფინალური ცოცხალი გამოსვლისათვის ემზადება.
76 წლის მუსიკოსმა ამის შესახებ საკუთარ გადაცემაში, Ozzy’s Boneyard-ში ისაუბრა, სადაც მიმოიხილა, თუ რას უნდა ელოდნენ მსმენელები დაანონსებული გამოსათხოვარი კონცერტისგან.
„2025 წლამდე მივაღწიე. ვერ დავდივარ, მაგრამ იცით, რას ვფიქრობდი დღესასწაულებზე? მთელი ჩემი წუწუნის მიუხედავად, ისევ ცოცხალი ვარ,“ – აღნიშნა მუსიკოსმა. „შეიძლება ვწუწუნებდე, რომ სიარული აღარ შემიძლია, მაგრამ როდესაც სხვების გზას თვალს გადავავლებ, ვხედავ ადამიანებს, რომლებსაც ჩემი ნახევარიც არ გაუკეთებიათ და ვერც აქამდე მიაღწიეს.“
Back to the Beginning – ასე ჰქვია ოსბორნის მსმენელთან გამოსათხოვარ კონცერტს, რომელიც 2025 წლის ივლისშია დაგეგმილი. კონცერტზე სხვადასხვა არტისტები და ბენდებიც მიიღებენ მონაწილეობას. მათ შორის არიან: Metallica, Slayer და Anthrax, Pantera, Lamb of God, Mastodon, Alice In Chains, Halestorm და გრემის გამარჯვებული Gojira. ღონისძიების მუსიკალური დირექტორი კომპოზიტორი და Rage Against the Machine-ის ყოფილი გიტარისტი ტომ მორელო იქნება. პრესრელიზში მან ამ კონცერტს „ყველა დროის უდიდესი მძიმე მეტალის ჟანრის შოუ“ უწოდა.
ღონისძიებას საქველმოქმედო დატვირთვაც ექნება – შემოსავალი გადაეცემა ორგანიზაციებს, რომლებიც პარკინსონით დაავადებულ პაციენტებს ეხმარებიან. მათ შორის არის ბრიტანული ფონდი Cure Parkinson, რომელიც ამ დაავადების დამარცხებაზე მუშაობს. სწორედ პარკინსონია ის დაავადება, რომლის დიაგნოზიც ოსბორნს 2019 წელს დაუსვეს.
BBC-სთან ინტერვიუში ოზი ოსბორნის ცოლმა და მენეჯერმა, შერონ ოსბორნმა განმარტა, რომ ეს კონცერტი მუსიკოსისთვის კარიერის ღირსეულად დასრულების საშუალებაა. აღსანიშნავია, რომ არტისტს ბოლო წლებში, ჯანმრთელობის პრობლემების გამო, მრავალი შოუს გაუქმება მოუწია.
„ის შესანიშნავად გრძნობს თავს, მართლა შესანიშნავად,“ – განაცხადა შერონ ოსბორნმა. „ის ამ კონცერტს მოუთმენლად ელის. მეგობრებთან ერთად ყოფნა და ამ ყველაფრის კიდევ ერთხელ განცდა მისთვის ძალიან ამაღელვებელია. ოზის აქამდე არ მიეცა შესაძლებლობა, რომ თავის მეგობრებსა და მსმენელებს გამომშვიდობებოდა. ის ფიქრობს, რომ წერტილი ჯერ კიდევ არ დასმულა. სწორედ ეს [კონცერტი] იქნება მისი წერტილი.“
The Sun-თან ჩაწერილ ინტერვიუში, შერონმა აღნიშნა, რომ ოზი, მიუხედავად ჯანმრთელობის მდგომარეობისა, ამ მნიშვნელოვან კონცერტისთვის მზად იქნება.
„ის ძალიან ბედნიერია დაბრუნებით და ამასთანავე, ძალიან ღელავს,“ – აღნიშნა მან. „პარკინსონი პროგრესირებადი დაავადებაა, მისი შეჩერება შეუძლებელია. ის სხეულის სხვადასხვა ნაწილზე მოქმედებს და ოზის შემთხვევაში, მას ფეხები დაუზიანდა, მაგრამ მისი ხმა ისეთივე ძლიერია, როგორც ყოველთვის.“
