„ტრანსკავკასია” – თემურიკო დიასამიძისა და ბექა გოჩიაშვილის ახალი კომპოზიცია

თემურიკო დიასამიძე ახალ კომპოზიციას აქვეყნებს, სახელწოდებით „ტრანსკავკასია”, რომელიც მისი და ბექა გოჩიაშვილის ერთობლივი ნამუშევარია. როგორც ავტორმა Billboard საქართველოსთან საუბარში აღნიშნა, ნაწარმოების თავდაპირველი ვერსია რამდენიმე წლის წინ შეიქმნა, შთაგონების წყაროდ კი ფრანგ დიდ ბებიასთან მისი პირადი საუბრის ჩანაწერი იქცა. 

თემურიკო დიასამიძე:

„ტრეკის დასაწყისში ქალის ხმა რომ ისმის, ეს არის ჩემი ფრანგი დიდი ბებია მადლენი, რომელიც სწორედ ტრანსკავკასიაზე ლაპარაკობს. ეს ჩემი და მისი პირადი საუბარია, რომელიც უბრალოდ ჩავიწერე. შემდეგ კი სწორედ ეს ჩანაწერი იქცა იდეად და გახდა მთავარი ფუძე, რომელზეც არის აგებული კომპოზიცია. სახელწოდება „ტრანსკავკასიაც” აქედან მოდის. თან, ქართული თემატიკით იწყება – ფანდურისა და ჭიანურის ხმებით. რადგან კავკასიასა და ქართულ კულტურაზე ვლაპარაკობთ, ქართული ფოლკლორის ელემენტებიც შევიტანე და ასეთი გამოვიდა – სხვადასხვა ჟანრის მიქსია და მგონი, საინტერესოა.

რეალურად, კომპოზიცია რამდენიმე წლის წინ გავაკეთე, ოღონდ ის სხვანაირი ვერსია იყო. შემდეგ კი უკვე ბექას მოვასმენინე და გადავწყვიტეთ, ერთად გვემუშავა მასზე და შეგვეცვალა. თემატიკა იგივე დარჩა, თუმცა ბექას ინსტრუმენტალის შემოსვლით სულ სხვა ფორმა მიიღო, ბევრად უკეთესი, და საბოლოოდ მივიდა იქამდე, სადამდეც უნდა მისულიყო.”