კენდრიკ ლამარს და Marvel-ს უკვე აქვთ თანამშრომლობის წარმატებული ისტორია – 2018 წელს რეპერმა Black Panther-ის საუნდტრეკი შექმნა. ამჯერად, არტისტი და კომპანია კვლავ გაერთიანდნენ ფილმისათვის – Captain America: Brave New World, რომელიც შეერთებული შტატების კინოთეატრებში პარასკევს, 14 თებერვალს გამოდის.
Captain America-ს ვარსკვლავმა, ენტონი მაკიმ, რომელიც ფილმში ფალკონის როლს ასრულებს, Entertainment Tonight-თან ინტერვიუში დაადასტურა, რომ კენდრიკ ლამარმა ბლოკბასტერის მთავარ საუნდტრეკზე იმუშავა. „კენდრიკმა შექმნა ფილმის მთავარი სიმღერა. აქ პირველად ვამხელ ამ ამბავს. სიგიჟეა, რა საოცარია მისი ოსტატობა და ხელოვნება,” – აღნიშნა მაკიმ.
ჯერ უცნობია, რა ერქმევა ტრეკს, თუმცა, სავარაუდოდ, ის ფილმის სათაურს – „Brave New World“-ს ეხმიანება. დიდი ალბათობით, მსმენელები ტრეკს ფილმის გამოსვლასთან ერთად მოისმენენ.
კენდრიკ ლამარი ფილმ Black Panther-ისთვის მუსიკალურ ალბომზე მუშაობისას მთავარი შემოქმედებითი ძალა იყო. მან ისეთი ჰიტები შექმნა, როგორიცაა All the Stars, King’s Dead და Pray for Me. ალბომმა 2018 წელს Billboard 200-ის ლიდერის პოზიციაც დაიკავა.
Captain America-ს პროექტში ჩართვა ლამარისთვის კიდევ ერთი დიდი ნაბიჯია და 2025 წლის შთამბეჭდავ კარიერულ მიღწევებს შეემატება. ბოლო ორი კვირის განმავლობაში, ლამარმა არა მხოლოდ ხუთი გრემი მოიპოვა, არამედ Super Bowl-ის მუსიკალური შოუს მთავარი შემსრულებელიც იყო.
რეპერი მცირე შემოქმედებითი შესვენების შემდეგ SZA-სთან ერთად Grand National Tour-ზე გაემგზავრება, რომელიც აპრილიდან დაიწყება და ჩრდილოეთ ამერიკის დიდ მუსიკალურ სივრცეებს დაიპყრობს.
იხილეთ ვიდეო, რომელშიც ენტონი მაკი Marvel-ის და კენდრიკ ლამარის უახლესი კოლაბორაციის შესახებ საუბრობს:
