ჯიმი კიმელი კანიე უესტის მიერ ბოლო დროს გავრცელებულ სიძულვილის ენას ეხმაურება. მონოლოგის დროს ტელეწამყვანმა რეპერს ნაცისტი უწოდა. „ანტისემიტური მოცურების შედეგად ადოლფ ტვიტლერს თავისმა სააგენტომ კონტრაქტი გაუწყვიტა ,” – თქვა ტელეწამყვანმა მას შემდეგ, რაც კანიეს ყოფილმა აგენტმა და პარტნიორმა, 33 & West -ის დამფუძნებელმა დენიელ მაკარტნიმ რეპერთან თანამშრომლობა შეაჩერა. მონოლოგში კიმელმა დონალდ ტრამპიც მოიხსენია, როგორც „კანიე ისტი”.
ახლახან კანიე უესტს სიძულვილის ენის გავრცელების ოთხდღიანი ეპიზოდი ჰქონდა, რომელიც პლატფორმა X-ზე 7 თებერვალს დაიწყო. რეპერმა ათობით პოსტი დადო, რომლებიც ჰომოფობიურ, მიზოგინიურ, აბლეისტურ და ანტისემიტურ ნარატივს შეიცავდა. უესტი ასევე ითხოვდა Diddy-ს განთავისუფლებას და აქებდა ჰიტლერს.
Super Bowl-ის დროს კანიემ Yeezy-ს სარეკლამო რგოლი გაავრცელა, სადაც ფანებს მის ვებსაიტზე პროდუქტის შეძენისკენ მოუწოდებდა. სტომატოლოგის სავარძელში მჯდომი რეპერი ვიდეოს საკუთარ თავს ტელეფონით უღებს. „მთელი ფული რეკლამისთვის ამ ახალ კბილებზე დავხარჯე,” – ამბობს უესტი და ბრილიანტებში ჩასმულ კბილებს აჩვენებს. „ასე რომ, ახლა აიფონით გადაღება მიწევს. შედით Yeezy.com-ზე.”
თუმცა როცა ფანები ვებგვერდზე გადავიდნენ, ერთადერთ გასაყიდ პროდუქტად სვასტიკის გამოსახულებიანი თეთრი მაისური დახვდათ. გვერდი მალევე დაიბლოკა.
