მადონა ფანებს ვალენტინობის დღეს საჩუქრად ახალ მუსიკალურ ნამუშევრებს დაჰპირდა. ერთი დღით ადრე, 13 თებერვალს, პოპვარსკვლავმა ინსტაგრამზე ფოტოკოლაჟი გამოაქვეყნა. ფოტოებზე ასახულია მისი სტუდიაში მუშაობის მომენტები. ზოგ კადრში მადონა მიკროფონთან დგას და მღერის, ზოგიერთ ფოტოში – დასარტყამ ინსტრუმენტებთან ზის. კადრებში ასევე ჩანს პროდიუსერი სტიუარტ პრაისიც, ასევე, მომღერლის შვილები, რომლებიც მადონას სტუდიაში ესტუმრნენ.
„ჩემი ვალენტინობის დღის საჩუქარი ფანებისთვის არის ის, რომ შეგატყობინოთ – ახალ მუსიკაში გულსა და სულს ვდებთ. ერთი სული მაქვს, გაგიზიაროთ,” – წერს მადონა ინსტაგრამზე გამოქვეყნებული პოსტის აღწერაში.
მადონამ კიდევ ერთხელ მიანიშნა, რომ ახალი პროექტის სახელწოდებაა Confessions Part 2 – ეს არის გაგრძელება მისი 2005 წლის ალბომისა Confessions on a Dance Floor, რომელმაც Billboard 200-ის ჩარტის ლიდერი პოზიცია დაიკავა. ამ პოსტამდე დაახლოებით ორი თვით ადრე, მომღერალმა გაამხილა, რომ პროდიუსერ პრაისთან ერთად კვლავ სტუდიაში დაბრუნდა. აღსანიშნავია, რომ პრაისი Confessions-ის პირველ ნაწილზე მუშაობდა. დეკემბერში მადონამ სოციალურ ქსელ X-ზე პრაისთან ერთად გადაღებული ფოტო გამოაქვეყნა შემდეგი წარწერით – „Confessions on a Dance Floor Part 2?“
2025 წლის იანვარში, ნიუ-იორკში, Comedy Cellar-ის სცენაზე, მადონა მოულოდნელად გამოჩნდა ემი შუმერთან ერთად და აუდიტორიას საკუთარი კომედიური ნომერი წარუდგინა. გარდა ამისა, ვარსკვლავი ამჟამად ბიოგრაფიულ ფილმზე მუშაობს, რომელიც მის ცხოვრებასა და კარიერას შეეხება.
