მიუხედავად ცოტა ხნის წინ გაკეთებული განცხადებისა, რომ შესაძლოა მუსიკას ჩამოშორებოდა, სელენა გომესი პოპვარსკვლავის ცხოვრებას დაუბრუნდა და ამ გზაზე გვერდით თავისი საქმრო ბენი ბლანკო დაიყენა.
„ჩემი ახალი ალბომი I Said I Love You First, რომელზეც ჩემს საუკეთესო მეგობართან, ბენი ბლანკოსთან ერთად ვიმუშავე, 21 მარტს გამოვა. ჩვენი პირველი სიმღერა Scared of Loving You უკვე დევს სტრიმინგ პლატფორმებზე. ერთი სული გვაქვს, ეს განსაკუთრებული პროექტი მალე გაგიზიაროთ!” – დაწერა გომესმა ინსტაგრამზე და ბლანკოსთან ერთად გადაღებული ფოტოები გამოაქვეყნა.
მუსიკალურ თანამშრომლობას გომესი და ბლანკო ბოლო რამდენიმე თვეა აანონსებენ. გომესს სტუდიური ალბომი 2020 წლის შემდეგ აღარ გამოუცია. მისი მესამე და ამ დრომდე ბოლო ალბომი Rare – Billboard 200-ის პირველ ადგილზე გავიდა. ალბომის ჰიტმა Lose You to Love Me კი გომესს Billboard Hot 100-ის პირველი ლიდერობა მოუტანა. 2021 წელს მომღერალმა ესპანურენოვანი EP – Revelación გამოსცა.
ეს არ არის პირველი შემთხვევა, როცა ბლანკო და გომესი ერთმანეთს შემოქმედებითად დაუკავშირდნენ. ბლანკო იყო თანაპროდიუსერი სიმღერებისა Kill Em with Kindness და Same Old Love გომესის 2015 წლის ალბომიდან Revival. წყვილმა ასევე ითანამშრომლა 2019 წელს სიმღერაზე I Can’t Get Enough. მათი ბოლო საქმიანი პარტნიორობა კი 2023 წელს შედგა გომესის სინგლზე Single Soon.
წყვილის რომანი 2023 წლის ივნისში დაიწყო, გასული წლის დეკემბერში კი მათი ნიშნობა შედგა. სასიხარულო ამბავი გომესმა ინსტაგრამზე გაავრცელა და ნიშნობის ბეჭდის ფოტო გამოაქვეყნა.
