2025 წლის BAFTA-ს დაჯილდოებაზე Conclave წლის საუკეთესო ფილმად დასახელდა. კინოსურათმა The Brutalist-თან ერთად ყველაზე მეტი – ოთხ-ოთხი ჯილდო მოიპოვა. ცერემონია კვირას, 16 თებერვალს, ლონდონის Royal Festival Hall-ში გაიმართა, ხოლო წამყვანის როლი Doctor Who-ს ვარსკვლავმა, დევიდ ტენანტმა მეორედ მოირგო.
Conclave-მა წლის საუკეთესო ფილმის ტიტულის გარდა, მოიპოვა ჯილდოები საუკეთესო ბრიტანული ფილმის, ადაპტირებული სცენარისა და მონტაჟისთვის. The Brutalist-მა კი გაიმარჯვა ნომინაციებში: საუკეთესო მსახიობი მამაკაცი (ედრიენ ბროუდი), საუკეთესო რეჟისორი (ბრეიდი კორბეტი), საუკეთესო ორიგინალური მუსიკა (დენიელ ბლუმბერგი) და საუკეთესო ოპერატორული ნამუშევარი (ლოლ კროული).
ორ-ორი ჯილდო გადაეცა ფილმებს: Emilia Pérez, A Real Pain, Wicked, Dune: Part Two, Anora და Wallace & Gromit: Vengeance Most Fowl. ბობ დილანის ბიოგრაფიული ფილმი A Complete Unknown კი ექვსი ნომინაციის მიუხედავად, გამარჯვების გარეშე დარჩა.
ედრიენ ბროუდი უკვე არაერთი დაჯილდოების გამარჯვებულია და ის ოსკარის მთავარი ფავორიტიც არის. თუმცა, სხვა წამყვანი კატეგორიები ჯერ კიდევ გაურკვეველია. The Brutalist-მა და Emilia Pérez-მა საუკეთესო ფილმის ჯილდო მოიპოვეს ოქროს გლობუსზე, ხოლო Anora-მ გაიმარჯვა Critics Choice Awards-ზე და ასევე Producers Guild, Directors Guild-ის და Writers Guild-ის დაჯილდოებებზე. BAFTA-ზე Conclave-ის გამარჯვებამ ოსკარამდე კიდევ უფრო მეტი გაურკვევლობა განაპირობა.
მიუხედავად იმისა, რომ BAFTA-ზე საუკეთესო მსახიობი ქალი Anora-ს მაიკი მედისონი გახდა, ოსკარისთვის ბრძოლა კვლავ დაძაბულია, სადაც დემი მური (The Substance) გამარჯვებულის ერთ-ერთ მთავარ კანდიდატად რჩება.
გასულ წელს BAFTA-სა და ოსკარის რვავე წამყვან კატეგორიაში გამარჯვებულები სრულად დაემთხვა. ამის საპირისპიროდ, ორი წლის წინ არც ერთი კატეგორია არ დაემთხვა. აღსანიშნავია, რომ ბოლო 10 წლის განმავლობაში BAFTA-ს საუკეთესო ფილმის მხოლოდ ორმა გამარჯვებულმა მოიპოვა ოსკარი წლის საუკეთესო ფილმისთვის. ესენი იყო: Nomadland (2021) და Oppenheimer (2024).
დენიელ ბლუმბერგი, რომელმაც BAFTA მოიპოვა საუკეთესო ორიგინალური მუსიკისთვის (The Brutalist), ასევე ნომინირებულია ოსკარზე. ის ლონდონელი მუსიკოსი, კომპოზიტორი და სიმღერების ავტორია. 2005-2009 წლებში იყო Cajun Dance Party-ის დამფუძნებელი წევრი და ვოკალისტი, ხოლო 2009-2013 წლებში – ფრონტმენი და გიტარისტი ჯგუფ Yuck-ში.
გაიცანით 2025 წლის BAFTA-ის გამარჯვებულები:
საუკეთესო ფილმი
Anora – ალექს კოკო, სამანტა ქუანი, შონ ბეიკერი
The Brutalist – ნიკ გორდონი, ბრაიან იანგი, ენდრიუ მორისონი, DJ გუგენჰაიმი, ბრეიდი კორბეტი
A Complete Unknown – ფრედ ბერჯერი, ალექს ჰაინემანი, ჯეიმს მენგოლდი
გამარჯვებული: Conclave – ტესა როსი, ჟულიეტ ჰაუელი, მაიკლ ეი ჯეკმანი
Emilia Pérez – პასკალ კოშტე, ჟაკ ოდიარი
საუკეთესო მსახიობი ქალი
სინტია ერივო, Wicked
კარლა სოფია გასკონი, Emilia Pérez
მარიან ჟან-ბატისტი, Hard Truths
გამარჯვებული: მაიკი მედისონი, Anora
დემი მური, The Substance
სირშა რონანი, The Outrun
საუკეთესო მსახიობი მამაკაცი:
გამარჯვებული: ედრიენ ბროუდი, The Brutalist
ტიმოთი შალამე, A Complete Unknown
კოლმან დომინგო, Sing Sing
რეიფ ფაინსი, Conclave
ჰიუ გრანტი, Heretic
სებასტიან სტენი, The Apprentice
საუკეთესო რეჟისორი
Anora — შონ ბეიკერი
გამარჯვებული: The Brutalist – ბრეიდი კორბეტი
Conclave – ედვარდ ბერგერი
Dune: Part Two – დენი ვილნევი
Emilia Pérez – ჟაკ ოდიარი
The Substance – კორალი ფარჯეა
საუკეთესო ორიგინალური სცენარი
Anora – შონ ბეიკერი
The Brutalist – ბრეიდი კორბეტი და მონა ფასტვოლდი
Kneecap – რიჩ პეპიატი, ნაოიშე ო კაირელანი, ლიამ ოგ ო ჰანაიდი, ჯეი ჯეი ო დოჰარტი
გამარჯვებული: A Real Pain – ჯესი აიზენბერგი
The Substance – კორალი ფარჯეა
საუკეთესო ადაპტირებული სცენარი
A Complete Unknown – ჯეიმს
მენგოლდი და ჯეი კოკსი
გამარჯვებული: Conclave – პიტერ სტრაუგანი
Emilia Pérez – ჟაკ ოდიარი
Nickel Boys – რამელ როსი და ჯოსლინ ბარნსი
Sing Sing – კლინტ ბენტლი, გრეგ კვედარი, კლარენს მაკლინი, ჯონ უიტფილდი
საუკეთესო ორიგინალური მუსიკა
გამარჯვებული: The Brutalist – დენიელ ბლუმბერგი
Conclave – ვოლკერ ბერტელმანი
Emilia Pérez – კამილ, კლემან დუკოლი
Nosferatu – რობინ კაროლანი
The Wild Robot – კრიზ ბაუერსი
იხილეთ 2025 წლის BAFTA-ის გამარჯვებულების სრული სია.
