16 მარტს, ნიუ-იორკში, ცნობილ კლუბ Nublu-ში ქართველი ქალი არტისტების Creams-ისა და Bako-ს ერთობლივი კონცერტი გაიმართება.
მუსიკოსი ნათია ჭიჭინაძე სასცენო სახელით, Creams-ით არის ცნობილი, რომელსაც ქართველი მსმენელი კარგად იცნობს. მომღერლის, პროდიუსერისა და სიმღერების ავტორის ცნობილი სიმღერებია Sleep On Me და PIE, რომელიც მის უნიკალურ ხელწერას და ჟღერადობას გადმოსცემს. 2024 წლიდან Creams ნიუ-იორკში ცხოვრობს. აღსანიშნავია, რომ არტისტი 2020 წლიდან Sony Music Group-ის მუსიკალურ ლეიბლთან, AWAL Records-თან თანამშრომლობს. 2025 წლის შემოდგომისთვის კი Creams სადებიუტო LP-ს გამოცემას გეგმავს.
Bako ამერიკაში მცხოვრები ქართველი არტისტის, მომღერლისა და სიმღერების ავტორის, ბარბარე მჭედლიშვილის სასცენო სახელია. მისი მუსიკა ინდი-სოულით და ალტერნატიული მუსიკით არის შთაგონებული. წელს მუსიკოსი სადებიუტო ალბომის Dreaming Again გამოუშვებას აპირებს.
„ქართველი ქალი არტისტების კონცერტების სერიის შექმნის იდეა შარშან გამიჩნდა. სერიის პირველი კონცერტი 16 მარტს, კლუბ Nublu-ში შედგება, სადაც ნიუ-იორკელ მსმენელებს Creams-ის და Bako-ს კონცერტზე დასწრების საშუალება ექნებათ.“ – ამბობს Billboard Georgia-სთან საუბარში ღონისძიების ორგანიზატორი მარიამ შარვაშიძე.
თუ ნიუ იორკში იმყოფებით, გირჩევთ არ გამოტოვოთ ეს კონცერტი, ბილეთების შეძენა კი ამ ბმულზეა შესაძლებელი.
