მაყურებელმა ცნობილი შოუს SNL-ის 50 წლის იუბილესადმი მიძღვნილი კონცერტი იხილა. SNL50: The Anniversary Special – ასე ერქვა სპეციალურ პროგრამას, რომელიც NBC-ის სატელევიზიო ეთერში 16 თებერვალს, სამსაათ-ნახევარი გადაიცემოდა. საკონცერტო პროგრამამ გააერთიანა რამდენიმე საკულტო სიმღერის ნომერი მუსიკის უახლესი ისტორიის ხუთი ათწლეულიდან. მაგრამ პროდიუსერებმა შოუს გახსნისა და დახურვისთვის 1960-იანი წლების მუსიკას მიანიჭეს უპირატესობა. შოუ პოლ საიმონმა და საბრინა კარპენტერმა გახსნეს Simon & Garfunkel-ის 1966 წლის კლასიკით – Homeward Bound. პოლ მაკარტნიმ კი კონცერტი დახურა ლეგენდარული ალბომის, Abbey Road-ის ფინალური სინგლების მიქსით.
ორი კვირით ადრე გამართულ გრემის დაჯილდოებაზე, ლედი გაგამ და ბრუნო მარსმა გრემის მფლობელი ჰიტი, Die With a Smile არ იმღერეს. არტისტებმა ლოს-ანჯელესის პატივსაცემად, რომელიც იანვარში ძლიერი ქარებისგან გაჩენილმა ხანძრებმა დააზარალა, Mamas and the Papas-ის 1966 წლის ჰიტი California Dreamin შეასრულეს.
ამერიკის კინოაკადემიის დაჯილდოებაზე ბობ დილანის შესახებ გადაღებული ბიოგრაფიული ფილმი A Complete Unknown რვა ნომინაციით არის წარდგენილი. ფილმი არტისტის ცხოვრებისა და შემოქმედების 1961-65 წლების პერიოდს ეხება. ეს პირველი ბიოგრაფიული ფილმია, რომლის სამი მსახიობი რეალური მუსიკოსის როლის შესრულებისთვის ოსკარზეა ნომინირებული. ესენი არიან: ტიმოთი შალამე (ბობ დილანი), ედვარდ ნორტონი (პიტ სიგერი) და მონიკა ბარბარო (ჯოან ბაეზი).
ჯერჯერობით უცნობია, იმღერებს თუ არა ტიმოთი შალამე, დილანი (ან საუკეთესო შემთხვევაში – ორივე ერთად) ოსკარების ცერემონიაზე, მაგრამ ეჭვგარეშეა, რომ პროდიუსერები ამაზე უკვე მუშაობენ.
როგორც აღმოჩნდა, ამერიკის წამყვან ტელეპროდიუსერებს სურთ, რაღაც საინტერესო იპოვონ ყველა თაობის მაყურებლისთვის.
მეორე, უფრო მნიშვნელოვანი მიზეზი თავად 1960-იანი წლების მუსიკის გავლენაა. ეს იყო ეპოქა, როდესაც The Beatles, ბობ დილანი, The Brill Building, Motown, Stax, ბერტ ბაქარაქი და ჰელ დევიდი, არეტა ფრანკლინი, Simon & Garfunkel, The Who, The Beach Boys, The Rolling Stones და კიდევ ბევრი სხვა არტისტი თავის შემოქმედებით მწვერვალზე იყო და ერთმანეთის შთაგონებით ქმნიდნენ დიდებულ მუსიკას.
ყველა თაობას სჯერა, რომ მათი ეპოქის მუსიკა საუკეთესოა, მაგრამ 1960-იანების თაობას ამის დამტკიცება არ სჭირდება. საკმარისია, უბრალოდ ზემოთ ჩამოთვლილი მუსიკოსები და მათი შედევრები მოიყვანონ მაგალითად.
საინტერესოა, რომ ეს არ არის პირველი შემთხვევა, როდესაც პოლ მაკარტნიმ საკულტო ტელეგადაცემა Abbey Road-ის ფინალური მუსიკალური მიქსით დახურა. ამ მიქსში გაერთიანდა ნამუშევრები: Golden Slumbers, Carry That Weight და The End. 2012 წლის გრემის დაჯილდოებაზეც მაკარტნიმ სწორედ ამ სიმღერებით დაასრულა ცერემონია ბრიუს სპრინგსტინის, დეივ გროლისა და ჯო უოლშის თანხლებით.
SNL50-ის სცენაზე Homeward Bound-ის შესრულებამდე პოლ საიმონსა და საბრინა კარპენტერს შორის მცირე დიალოგი შედგა. „ეს სიმღერა ჯორჯ ჰარისონთან ერთად Saturday Night Live-ზე 1976 წელს შევასრულე,“ – გაიხსენა საიმონმა. „მე მაშინ არ ვარსებობდი, არც ჩემი მშობლები…“ – უპასუხა კარპენტერმა, რომელიც 1999 წლის მაისში დაიბადა.
