The Contenders Billboard-ის შუა კვირის სვეტია, რომელიც იმ არტისტებს აანალიზებს და პროცესებს განსაზღვრავს, რომლებიც Billboard-ის ჩარტების მწვერვალისკენ ისწრაფვიან და ამისთვის სტრატეგიულად მოქმედებენ.
პირველი მარტით დათარიღებული Billboard 200-ის ჩარტში მოსალოდნელი შედეგებისთვის, ვიხილავთ, თუ რამდენად აქვს შანსი Drake-სა და PartyNextDoor-ის ახალ, სრულმასშტაბიან, ერთობლივ ალბომს, რათა კენდრიკ ლამარი ლიდერ პოზიციაზე ჩაანაცვლოს.
PartyNextDoor & Drake – $ome $exy $ongs 4 U
2024 წელს კენდრიკ ლამართან დაპირისპირების შემდეგ, რომელიც კულტურულ მოვლენად იქცა, Drake-მა ბევრი გამარჯვება ვერ მოიპოვა. ეს დაძაბულობა დღემდე იგრძნობა – თითქმის ერთი წლის შემდეგაც კი. ლამარი სიმღერით Not Like Us კვლავ დომინირებს, არტისტმა ახლახან ხუთი გრემი მოიგო და Super Bowl-ის ნახევარფინალი ისტორიულად ყველაზე ნახვადი შოუ გახდა. თუმცა, შესაძლოა, Drake-მა მალე გამარჯვება იზეიმოს. $ome $exy $ongs 4 U – მისი პირველი სრულფასოვანი ალბომია 2023 წლის For All the Dogs-ის შემდეგ, რომელიც R&B ჟანრის ნამუშევარია და ვალენტინობის დღეს გამოვიდა. არტისტმა კოლაბორაციული ალბომი PartyNextDoor-თან, ერთად ჩაწერა, რომელიც მისივე ლეიბლის, OVO-ს, წევრიც არის.
21-ტრეკიანი ალბომი გამოსვლისთანავე Spotify-ის (Daily Top Songs USA) და Apple Music-ის ჩარტებში პირველ ადგილზე მოხვდა. ალბომმა პირველივე დღეს სტრიმინგით Apple Music-ის ისტორიაში ყველაზე დიდი R&B/Soul ალბომის რეკორდი დაამყარა და გლობალურად, კვლავ ინარჩუნებს მყარ პოზიციებს.
მიუხედავად იმისა, რომ ალბომის ბევრი ტრეკის ყოველდღიური სტრიმინგი შემცირდა, ზოგიერთმა სიმღერამ რეიტინგული ზრდა მაინც განაგრძო, მაგალითად Die Trying-მა და ასევე Nokia-მ, რომელშიც პოპის გავლენაც იგრძნობა, ეს უკანასკნელი iTunes-ის რეალურ დროის ჩარტში ლიდერ პოზიციას მთელი კვირის განმავლობაში იკავებდა. გარდა ამისა, ალბომი CD ფორმატში ოფიციალურ ვებგვერდზე, სამი განსხვავებული ვერსიით იყიდება.
ალბომი $ome $exy $ongs 4 U, სავარაუდოდ, ვერ მიაღწევს Drake-ის წინა ალბომის პირველი კვირის მაჩვენებლებს, თუმცა დიდი ალბათობით, ალბომი რეპერს Billboard 200-ზე კვლავ No.1 პოზიციაზე დააბრუნებს.
ამ გამარჯვებით, რეკორდული მაჩვენებლებით Drake არტისტ Jay-Z-ს გაუთანაბრდება (14 No. 1 ალბომი), და დროებით მაინც გააჩერებს კრიტიკოსებს, რომლებმაც 2024 წლის კენდრიკ ლამარისა და Drake-ის კონფლიქტის შემდეგ, Drake-ს „არასრულფასოვანი” უწოდეს. ამასთან, კენდრიკ ლამარის ალბომი GNX ამჟამად ჩარტის სათავეშია, რაც ნიშნავს, რომ Drake-მა შეიძლება, თავისი მთავარი ოპონენტის წინააღმდეგ მნიშვნელოვანი გამარჯვება იზეიმოს.
კენდრიკ ლამარი – GNX
თუ Drake მომავალ კვირას Billboard 200-ის სათავეში მოექცევა, ეს არ ნიშნავს, რომ კენდრიკ ლამარი ჩარტებიდან გაქრება. პირიქით, Super Bowl-ის გამოსვლის შემდეგ, პირველ სრულ კვირაში, მისი სტრიმინგის მაჩვენებლები დიდი ალბათობით, კიდევ უფრო გაიზრდება.
2024 წლის ჰიტ ალბომ GNX-ის ტრეკები, როგორიცაა Squabble Up, TV Off და SZA-სთან კოლაბორაციული სიმღერა Luther, კვლავ დიდი პოპულარობით სარგებლობს. ამასთან, Luther იმდენად წარმატებული სიმღერა აღმოჩნდა, რომ შესაძლოა, თვით კენდრიკ ლამარის ჰიტს, Not Like Us-ს გაუსწროს და მომავალ კვირას Billboard Hot 100-ის პირველი ადგილი დაიკავოს.
კენდრიკ ლამარის ალბომი GNX მხოლოდ 12-ტრეკიანია, რაც მას სტრიმინგის რაოდენობრივ უპირატესობას აკარგვინებს. Drake-ის ალბომი $ome $exy $ongs 4 U კი 21 ტრეკისგან შედგება.
GNX-ის ფიზიკური გამოცემები (კასეტა, ვინილი და CD), 7 თებერვალს გამოვიდა, რამაც მნიშვნელოვნად გაზარდა მისი გაყიდვები, თუმცა, ახლა, ფიზიკური გაყიდვების შემცირებასთან ერთად, ალბომი სავარაუდოდ, ჩარტებშიც დაქვეითდება.
მიუხედავად ამისა, GNX-ის ჰიტები კვლავ სტრიმინგ-სათავეშია, რაც იმის წინაპირობაა, რომ ალბომი ჩარტის ზედა მაჩვენებელ ადგილს შეინარჩუნებს. თუ ჩარტი ახალი სიმღერებით არ განახლდება, შესაძლოა GNX მესამე ჯერზეც აღმოჩნდეს პირველ ადგილზე.
საბრინა კარპენტერი – Short n’ Sweet (Island)
2024 წლის კიდევ ერთი გამორჩეული არტისტი, რომელმაც Billboard 200-ის სათავეში რამდენიმე კვირა გაატარა და თვეების განმავლობაში ტოპ 10-ში იმყოფებოდა, საბრინა კარპენტერია. პოპ-სუპერვარსკვლავმა მომავალ კვირას, შესაძლოა, ჩარტებში დიდი ნახტომით წაიწიოს წინ.
14 თებერვალს საბრინა კარპენტერმა ალბომ – Short n’ Sweet-ის დელუქს ვერსია გამოსცა. 12-ტრეკიან ალბომს ოთხი სრულიად ახალი სიმღერა შემატა. ახალ ვერსიაში 17 ტრეკია გაერთიანებული, რომლის მთავარ ჰიტ სიმღერაში – Please Please Please ქანთრი-ლეგენდა დოლი პარტონი მონაწილეობს.
Short n’ Sweet-ის დელუქს ვერსიის გამოცემა და ალბომის თავდაპირველი სტაბილური სტრიმინგი მას Billboard 200-ის ტოპ კონკურენტად ავტომატურად აქცევს. თებერვლის განმავლობაში, ალბომი ტოპ 10-ის ქვედა ნაწილში პოზიციას სტაბილურად ინარჩუნებდა, ხოლო დელუქს ვერსიის გამოცემამ მისი წინა პოზიციებზე გადანაცვლება უნდა უზრუნველყოს.
Short n’ Sweet-ის ახალი ბონუს ტრეკების სტრიმინგის მაჩვენებლები მყარია, სადაც სინგლი Busy Woman ლიდერობს. ალბომის ფიზიკური გაყიდვებიც წარმატებულად მიმდინარეობს. დელუქს ვერსია ხელმისაწვდომია ვებ-მაღაზიებში, ვინილზე და CD-ზე.
The Lumineers – Automatic
ამერიკული ალტერნატიული ფოლკ ბენდის The Lumineers-ის ახალი ალბომი Automatic პირველ ნამუშევართან შედარებით (2022 წლის Brightside), არ მოიცავს მასშტაბურ ჰიტებს, თუმცა, ნოა კაჰანის მონაწილეობით, ფოლკ-მუსიკის ახალ ტალღას ასევე ახალი ჟღერადობა მიეცა.
ალბომი რვა განსხვავებული ვინილ ვერსიით იყიდება, მათ შორის, ხელმოწერილი გამოცემით. The Lumineers-ის წინა ოთხივე ალბომმა Billboard 200-ის ტოპ 10-ში მოხვედრა შეძლო, თუმცა, ახალ ალბომ Automatic-ს, სტრიმინგის დაბალი მაჩვენებლების გამო, უფრო და უფრო მეტი გაყიდვები დასჭირდება, რათა წარმატებების სერია გააგრძელოს.
