რიანა ოჯახურ ცხოვრებასა და მუსიკალური კარიერის შემდეგ ეტაპზე საუბრობს. Harper’s BAZAAR-ის 2025 წლის მარტის ნომერში, რომელიც 22 თებერვალს გამოქვეყნდა, 37 წლის მომღერალი თავისი ცხოვრების სხვადასხვა ასპექტს შეეხო. რიანამ ისაუბრა ალბომზე სახელწოდებით R9, რომელსაც მსმენელი დიდი ხანია, ელის. ასევე განიხილა პარტნიორ A$AP Rocky-სთან თანაცხოვრება და მასთან ერთად შვილების აღზრდა. ვარსკვლავმა თავისი ბიზნეს იმპერიის გაფართოების გეგმებზეც ისაუბრა.
ინტერვიუში რიანამ განიხილა თავისი ახალი მუსიკის კრეატიული მიმართულება და უარყო ჭორები იმის შესახებ, რომ მისი მომავალი ალბომი რეგის ჟანრის იქნება. „ნამდვილად არა! ახლა მუსიკას ჟანრი აღარ აქვს,“ – განმარტავს რიანა. „ყოველ ჯერზე ვამბობდი: არა, ეს არ არის ჩემი. არასწორია. ეს არ შეესაბამება ჩემს განვითარებას. არ შეესაბამება ჩემს ევოლუციას. ამას ვერ გავაკეთებ. ერთწლიანი ტურის განმავლობაში ამას ვერ შევასრულებ. გარკვეული დროის შემდეგ გავაანალიზე და მივხვდი, რომ ამდენი წლის დუმილს საფუძველი უნდა ჩაეყარა ღირებული მომდევნო ეტაპისთვის. ის ფასეულო უნდა იყოს. უნდა ჰქონდეს მნიშვნელობა. უნდა ვაჩვენო ხალხს, რომ ლოდინი ღირდა. ვერ გამოვუშვებ საშუალო დონის ნამუშევარს. თუ რვა წელი ელოდებოდი, შეგიძლია, კიდევ ცოტაც მოიცადო.“
რიანას თქმით, სტუდიაში მუშაობისას, ის შვილებისგან შორს იქნება და ეს დრო უნდა მიუძღვნას იმას, რაც რვა წელი უყურადღებოდ დატოვა. „ეს [ალბომი] არც კომერციული იქნება და არც რადიოში ადვილად მოსასმენად გათვლილი. ის დაიკავებს ადგილს, რომელსაც ჩემი შემოქმედებითი განვითარება იმსახურებს. მგონია, რომ საბოლოოდ ვიპოვე პასუხი!”
რიანას 2016 წლის Anti-ს შემდეგ ალბომი აღარ გამოუშვია. Anti ალბომი Billboard 200-ის სათავეში ორი კვირის განმავლობაში იმყოფებოდა. ამის შემდეგ მან მხოლოდ რამდენიმე რემიქსი გამოაქვეყნა და Black Panther: Wakanda Forever-ის საუნდტრეკზე იმუშავა, სადაც მისი სიმღერები Born Again და Lift Me Up შევიდა. უკანასკნელმა კომპოზიციამ გრემის ნომინაცია მოიპოვა. სიმღერამ ასევე მიიღო ოსკარის ნომინაციაც საუკეთესო ორიგინალური სიმღერის კატეგორიაში.
„Anti-ს თავიდან ბოლომდე ვუსმენ, ყოველგვარი უხერხულობის გარეშე,“ – ამბობს რიანა. „ადრე ყოველთვის რაღაც სირცხვილს ვგრძნობდი. რეალურად, არ მიყვარს ჩემი მუსიკის მოსმენა, მაგრამ Anti-ს ვუსმენ. როცა ვუსმენ, მგონია, თითქოს მე არ ვარ ის, ვინც მღერის. ეს არის ერთადერთი ალბომი, რომელსაც ისე ვუსმენ, თითქოს ეს მე არ ვიყო… იცი, როგორია, როცა შენი ხმა ავტო-მოპასუხეში გესმის და ფიქრობ, რომ საშინელებაა?!”
რიანამ ასევე ისაუბრა დედობის გამოცდილებაზე და A$AP Rocky-სთან ერთად თავისი ორი შვილის – RZA-სა და Riot-ის აღზრდაზე. აღსანიშნავია, რომ A$AP Rocky ცოტა ხნის წინ ცეცხლსასროლი იარაღით თავდასხმის ბრალდებაში უდანაშაულოდ ცნეს.
„ჩემი ყველა გადაწყვეტილება მათზეა ორიენტირებული, მაგრამ ყველაფერი, რასაც ვაკეთებ და რაც მიყვარს, მათგან მაშორებს,“ – ამბობს რიანა. „ამიტომ უცნაური აგრესია მიჩნდება იმ საქმეების მიმართ, რომლებიც მიყვარს. თითქოს ამ საქმეების გამო ყოველთვის რაღაც ზარალდება. და როცა იქ ხარ, მაინც 100%-ით ვერ ხარ ჩართული, რადგან ფიქრებით სხვაგანაც ხარ. ამან ძალიან დიდი შინაგანი დანაშაულის განცდა გამიჩინა.“
მან ასევე ისაუბრა A$AP Rocky-ს მამობრივი როლის შესახებ: „მისი გულწრფელობა, მისი ხიბლი… მაგიჟებს ის ფაქტი, რომ ხანდახან ჩემი შვილები მისით უფრო ცოცხლობენ, ვიდრე ჩემით,“ – ამბობს რიანა. „და მეც ვეუბნები: იცით, ვინ გაგზარდათ? იცით, ვინ მოგავლინათ ამ ქვეყნად? ისინი მაინც მასთან გარბიან. მაგრამ როცა ამას ვხედავ, ეს საუკეთესო შეგრძნებაა.“
ინტერვიუში რიანამ ხაზი გაუსვა თავისი ბიზნეს იმპერიის მნიშვნელობას, რომელიც მოიცავს Fenty Beauty-ს და Savage X Fenty-ს.
„ვზრუნავ ამაზე, რადგან ჩემი სახელი აწერია. არ მინდა, ჩემი სახელი ასოცირდებოდეს ისეთ რამესთან, რასაც მთლიანად არ ვიზიარებ.”
