რობერტა ფლეკი, 1970-იანი წლების R&B ვარსკვლავი და ოთხი გრემის მფლობელი მომღერალი, 24 თებერვალს 88 წლის ასაკში გარდაიცვალა. ინფორმაცია ამის შესახებ ფლეკის ოფიციალურმა წარმომადგენელმა გაავრცელა. გარდაცვალების მიზეზი ამ ეტაპზე არ დასახელებულა.
„გულდაწყვეტილები ვართ, რადგან დიდებული რობერტა ფლეკი ამ დილას, 2025 წლის 24 თებერვალს გარდაიცვალა,” – ვკითხულობთ განცხადებაში. „მან მშვიდად, ოჯახის წევრების გარემოცვაში განისვენა. რობერტამ გაარღვია საზღვრები და მოხსნა რეკორდები.”
ფლეკი ცნობილია ისეთი ჰიტებით, როგორებიცაა Killing Me Softly და The First Time Ever I Saw Your Face, რომელიც 1971 წელს კლინტ ისტვუდის სადებიუტო სარეჟისორო ნამუშევარში, Play Misty for Me-ში გაჟღერდა.
ფლეკს ჯამში Billboard Hot 100-ში შესული 18 ჰიტი, ხოლო Billboard 200-ის ტოპ სამეულის ოთხი ალბომი აქვს. ის იყო პირველი მუსიკოსი, რომელმაც წლის ჩანაწერის კატეგორიაში გრემი ზედიზედ ორჯერ მოიგო – 1973 და 1974 წლებში. მას შემდეგ ამ შედეგის გამეორება მხოლოდ 2001 და 2002 წელს U2-მ მოახერხა.
