რობერტა ფლეკის ისტორია აღწერილია მის მიერ 2023 წელს გამოცემულ საბავშვო წიგნში, რომელიც გრემის მფლობელი მომღერლის გარდაცვალების შემდეგ კიდევ ერთხელ მოექცა ყურადღების ცენტრში.
The Green Piano ილუსტრირებული ავტობიოგრაფიული წიგნია, რომელიც მომღერლის ამბავს მოგვითხრობს ბავშვობიდან მსოფლიო ვარსკვლავობამდე. ისტორია მწვანე ფორტეპიანოთი იწყება, რომელიც ფლეკის მამამ ნაგავსაყრელზე იპოვა და ქალიშვილისთვის შეაკეთა. წიგნი, რომელიც პირველად ორი წლის წინ გამოიცა, დღეს ამაზონის ბესტსელერების ჩარტის პირველ ადგილზე დაბრუნდა.
40-გვერდიანი ილუსტრირებული წიგნი მიჰყვება პატარა რობერტას ცხოვრების გზას, რომელსაც ფორტეპიანოზე დაკვრა უყვარდება და საკუთარი თავის სიმღერით გამოხატვას სწავლობს. „როცა მამა ნაგავსაყრელზე ძველ ფორტეპიანოს შენიშნავს, ის ხვდება, რომ შეუძლია ქალიშვილის ოცნება რეალობად აქციოს,” – ვკითხულობთ გამომცემლის აღწერაში. „მას ფორტეპიანო სახლში მოაქვს, წმენდს, აწყობს და ბალახისფერ მწვანედ ღებავს. მალე კი პატარა გოგონას საკუთარი ინსტრუმენტი აქვს, მასთან ერთად კი – ახალი ოცნება, გახდეს მუსიკალური სამყაროს ლეგენდა.”
რა თქმა უნდა, მწვანე ფორტეპიანოსთან გატარებული ეს დღეები და ღამეები ფლეკს დაეხმარა, განევითარებინა მუსიკალურობა და ხმა, რომელმაც საბოლოოდ შეამკო ისეთი ჰიტები, როგორებიცაა The First Time Ever I Saw Your Face და Killing Me Softly with His Song.
The Green Piano ფლეკმა და ტონია ბოლდენმა დაწერეს. წიგნის ილუსტრაციები მხატვარ ჰეიდენ გუდმენს ეკუთვნის. The Green Piano-ს შეძენა შესაძლებელია ამაზონზე. ასევე გამოსულია წიგნის აუდიოვერსიაც.
რობერტა ფლეკი 24 თებერვალს 88 წლის ასაკში გარდაიცვალა.
