ლეგენდარულმა ამერიკელმა სკეიტბორდისტმა ტონი ჰოუკმა სოციალურ ქსელში პოსტი გამოაქვეყნა, სადაც სინანულით აღნიშნავს, რომ სამწუხაროა, კურტ კობეინი მათ საერთო შვილიშვილს რომ ვერ მოესწრო.
ჰოუკის შვილს რაილი ჰოუკსა და კურტ კობეინის ქალიშვილს, 2024 წლის სექტემბერში ვაჟი შეეძინათ. „რონინ უოლკერ კობეინ-ჰოუკი – გამარჯობა, ყველაზე მშვენიერო.“ – წერდა მაშინ ფრენსის კობეინი სოციალურ ქსელში.
რაილი ჰოუკი და ფრენსის კობეინი 2023 წელს დაქორწინდნენ, წყვილის მშობლები კი 90-იანი წლებში ერთ-ერთ ყველაზე გავლენიან და ლეგენდარულ პერსონებად ითვლებოდნენ.
სოციალურ ქსელში ტონი ჰოუკი იხსენებს, თუ რა გავლენა მოახდინა კურტ კობეინმა მის ცხოვრებაზე.
ტონიმ ინსტაგრამ სთორიში Nirvana-ს 1991 წლის 20 ოქტომბრის ბილეთიც გააზიარა, რომელიც ტეხასში, ჰიუსტონში მდებარე კლუბ Vatican-ში გაიმართა. ჰოუკის თქმით, იმ დროს ქალაქში სკეიტბორდის შეჯიბრისთვის იმყოფებოდა და ღონისძიების დასრულების შემდეგ პირდაპირ კონცერტზე წავიდა.
„ეს იყო ერთ-ერთი იშვიათი და გარდამტეხი გამოცდილება, რომელსაც ცოცხალი მუსიკა ქმნის. იმ საღამოს, ყველამ რაღაც განსაკუთრებული და ძლიერი ვიგრძენით. სამყარო აღარასოდეს იქნებოდა ისეთი, როგორიც მანამდე იყო.“ – დაწერა ტონი ჰოუკმა Nirvana-ს კონცერტის შესახებ.
1991 წლის ეს კონცერტი Nirvana-ს გლობალურ წარმატებამდე შედგა, მასზე დასასწრები ბილეთი 10 დოლარი ღირდა, კონცერტი კი Nirvana-ს ალბომის გამოსვლის მხარდამჭერი იყო, რომელმაც ბენდი ისტორიაში ერთ-ერთ ყველაზე გავლენიან გრანჟ ჯგუფად აქცია. სამ თვეში ალბომმა მაიკლ ჯექსონის ალბომი Dangerous, Billboard 200-ის სათავეში ჩაანაცვლა და Nirvana მსოფლიო მასშტაბით ცნობილ ბენდად აქცია.
„მინდა, რომ კურტი აქ იყოს, რათა თავისი საოცარი ქალიშვილი იხილოს, შეხვდეს მის ერთგულ და მზრუნველ მეუღლეს და ხელში დაიჭიროს ჩვენი საერთო, საოცარი შვილიშვილი.“ – თქვა ჰოუკმა.
ბოლო პერიოდში, როგორც Nirvana, ისე ტონი ჰოუკი ყურადღების ცენტრში მოექცნენ. ლოს ანჯელესში ტყის ხანძრების დასახმარებლად გამართულ საქველმოქმედო კონცერტსა და SNL50-ის იუბილეზე Nirvana-ს ცოცხლად შესრულებულმა სიმღერებმა საზოგადოებაში დიდი გამოხმაურება გამოიწვია, ხოლო ტონი ჰოუკის სახელობის ვიდეოთამაშების სერია „გეიმ სამყაროს“ მთავარ თემად იქცა.
