ქართული ანდერგრაუნდ-ალტერნატიული მუსიკის პიონერ ბენდი წერილი 90-იან წლებში, 1995 წელს ჩამოყალიბდა. წელს ჯგუფი დაარსებიდან 30 წლის იუბილეს აღნიშნავს, ამ თარიღთან დაკავშირებით კი ახალ ალბომზეც მუშაობს, სადაც დაახლოებით 10-12 სიმღერა იქნება გაერთიანებული.
ბენდმა იანვარში სიმღერა სახელწოდებით „დარაჯი“ გამოაქვეყნა, რომელიც ჯგუფის დამფუძნებლის, ვოკალისტის და სიმღერების ავტორის გია თოიძის თქმით, დაუგეგმავად ჩაიწერა.
„სიმღერა ძალიან სპონტანურად ჩაიწერა, „საუნდკარტას“ ვტესტავდით სახლში და აკუსტიკური ვერსია მოვსინჯეთ, თუ როგორ ხარისხს მივიღებდით, ამიტომაც ითვლება „დემო ვერსიად” და მომდევნო ალბომში უკვე დრამთან ერთად, სტუდიური ჩანაწერი შევა.
თვითონ სიმღერის დაწერის პროცესი და ინსპირაცია როგორ მოვიდა, ამის ახსნა ჩემთვის ყველაზე რთულია, არ შემიძლია ტექსტის არც სიღრმისეული განხილვა, არც ზედაპირული, მირჩევნია ეს მსმენელს მივანდო. სიმღერას როცა ვწერ, ემოციური დამოკიდებულება მაქვს და სახელებს ვერ ვარქმევ, ამ ტექსტში ბევრი ეპიზოდი იკვეთება, რომელიც თემატურად, ცალ-ცალკე ბევრ საკითხს მოიცავს, მაგრამ შეკრულია, როგორც ერთი სიმღერა. ჩემთვის უფრო მაგარია, როცა მღერი და უბრალოდ წერ, ვიდრე ის, როცა ხსნი, თუ როგორია სიმღერა.” – აღნიშნა Billboard Georgia-სთან საუბარში გია თოიძემ.
ანდერგრაუნდ ბენდს წელს დაარსებიდან 30 წელი უსრულდება, ამის აღსანიშნად კი „წერილი” ახალი ალბომის გამოცემას გეგმავს, რომელშიც თორმეტამდე ტრეკი გაერთიანდება.
„ბევრი სიმღერა გვაქვს მზად იმისთვის, რომ არაერთი ალბომი ჩაიწეროს. ამ ეტაპზე არც სახელი გვაქვს შერჩეული, მაგრამ რომ შეიკვრება სიმღერების თანმიმდევრობა, შემდეგ გამოჩნდება, თუ რა შეიძლება დავარქვათ ალბომს.“ – გია თოიძე.
სიმღერაში „დარაჯი” მძიმე, მძაფრი ემოციებით გაჟღენთილ ტექსტია, რომელიც მარტოობის, წინააღმდეგობის და დაუმორჩილებლობის განცდით არის სავსე. მიუხედავად იმისა, რომ ლირიული მუსიკა თითქოს მინორულ განწყობაზე გვაყენებს, მასში რევოლუციური სულისკვეთების, სიმტკიცის და შეუპოვრობის განცდა იგრძნობა. „დარაჯის” მოსმენისას გეუფლება განცდა, თითქოს ეს არის ხმა სიჩუმეში, რომელიც სიცარიელეში, ჩამქრალი ცეცხლის კვლავ გაღვივებას ცდილობს.
მოისმინეთ: წერილი – დარაჯი (Home acoustic Demo version)
