2025 წლის ოსკარის ცერემონიის ერთ-ერთი სიურპრიზი სცენაზე მიკ ჯაგერის გამოჩენა იყო. „ჩემთვის დიდი პატივია, რომ ამ ჯილდოს გადასაცემად დამპატიჟეს,” – თქვა მუსიკოსმა სცენიდან. „მაგრამ, მიუხედავად ჩემი სურვილისა, მე არ ვყოფილვარ პირველი არჩევანი. პროდიუსერებს ბობ დილანის მოწვევა სურდათ, თუმცა დილანი ამას არ გააკეთებდა, რადგან, მისი თქმით, ფილმისთვის შექმნილი საუკეთესო სიმღერა წელს A Complete Unknown-ში იყო,” – იხუმრა ჯაგერმა და თან დილანის იმიტაციაც გააკეთა. „ბობმა თქვა, ვინმე უფრო ახალგაზრდა უნდა ნახოთო,” – გაიცინა ჯაგერმა. „მე უფრო ახალგაზრდა ვარ, ვიდრე ბობ დილანი!” ცნობისთვის, დილანი 83 წლისაა, ჯაგერი კი – 81-ის.
მას შემდეგ, რაც ჯაგერმა გამოაცხადა, რომ ოსკარის მფლობელი სიმღერა Emilia Pérez-ის El Mal გახდა, სცენაზე ფილმის რეჟისორი კლემან დუკოლი და კომპოზიტორები კამილ და ჟაკ ოდიარები ავიდნენ. ჯაგერის პატივსაცემად კამილმა The Rolling Stones-ის Sympathy for the Devil-იდან მცირე ფრაზაც წაიმღერა.
სამადლობელი სიტყვა სიმღერის ავტორებმა წარმოთქვეს. „ჩვენ El Mal კორუფციის დასაგმობად შევქმენით, “ – თქვა კამილმა.
საუკეთესო ორიგინალური სიმღერის კატეგორიაში ასევე წარდგენილი იყვნენ: The Journey ფილმიდან The Six Triple Eight; Like a Bird ფილმიდან Sing Sing; Mi Camino ფილმიდან Emilia Pérez; და Never Too Late ფილმიდან Elton John: Never Too Late.
