LISA-მ, Doja Cat-მა და RAYE-მ ცოტა ხნის წინ ერთობლივად გამოუშვეს ახალი პოპ-სინგლი – Born Again, თუმცა ოსკარის 97-ე ცერემონიაზე მათ ეს სიმღერა არ შეუსრულებიათ. ამის ნაცვლად, არტისტებმა ჰოლივუდის Dolby Theatre-ის სცენაზე წარდგნენ ჯეიმს ბონდის ფრენჩაიზისადმი მიძღვნილი მუსიკალური ნომრებით.
სცენაზე გამოსვლამდე ჰოლი ბერიმ ფილმისადმი მიძღვნილი სიტყვა წარმოთქვა და აუდიტორიამ იხილა მონტაჟი ჯეიმს ბონდის ფილმებიდან. ეს კოლაჟი საკულტო ფრენჩაიზის ათწლეულებს მოიცავდა. ამის შემდეგ, The Substance-ის ვარსკვლავი, მარგარეტ ქუოლი, კლასიკურ შავ-თეთრ სმოკინგში გამოწყობილ მოცეკვავეებთან ერთად სცენაზე გამოჩნდა და საცეკვაო ნომერი შეასრულა. სწორედ ამ მომენტში ავიდა სცენაზე LISA. ვარსკვლავმა რამდენიმე წამით იმღერა პოლ მაკარტნისა და Wings-ის Live and Let Die, რომელიც ჯეიმს ბონდის 1973 წლის ამავე სახელწოდების ფილმში გაჟღერდა.
LISA-ს შემდეგ სცენაზე ბრწყინვალე თვლებით გაფორმებულ კოსტიუმში გამოწყობილი Doja Cat გამოვიდა. მან შეასრულა შირლი ბესის საკულტო თემატური სიმღერა 1971 წლის ბონდიანადან, Diamonds Are Forever და შთამბეჭდავი ვოკალური ინტერპრეტაციით დრამატული ელფერი შესძინა ნომერს. ბონდის ფრენჩაიზისადმი მიძღვნილი ნაწილი დასრულდა RAYE-ს შესრულებით – მან სცენა მარტომ დაიკავა და ადელის Skyfall იმღერა. აღსანიშნავია, რომ ერთი თვით ადრე RAYE-მ გრემის სცენაზე უკვე გამოავლინა თავისი მრავალფეროვანი ვოკალური შესაძლებლობები, სადაც საუკეთესო ახალ არტისტად იყო ნომინირებული.
მუსიკალური ნომრების შესრულების ბოლოს სამივე არტისტმა დამსწრე აუდიტორიის მქუხარე აპლოდისმენტები დაიმსახურა. მუსიკოსები სცენის ცენტრში ერთმანეთს ჩაეხუტნენ. მათი ახალი ერთობლივი სინგლი – Born Again, შესულია LISA-ს ალბომში, სახელწოდებით Alter Ego. ამ დრომდე სიმღერამ Hot 100-ის ჩარტში 68-ე პოზიცია დაიკავა.
