A$AP Rocky-მ კიდევ ერთხელ ისაუბრა ხმაურიანად დაანონსებულ ალბომზე Don’t Be Dumb. ამჯერად, მას ინსტაგრამის ბლოგი The People Gallery დაუკავშირდა და პირდაპირ ჰკითხა, როდის გეგმავდა ალბომის გამოშვებას.
„ასე ნუ მექცევით,“ – უპასუხა მან ხუმრობით. „ასეთი კითხვების გამო ყველა ჩემ წინააღმდეგ არის. ვერაფერს ვიტყვი… ახლა უნდა წავიდე.“
A$AP Rocky speaks on his new album release 👀
— NFR Podcast (@nfr_podcast) March 12, 2025
"You gon' get me beat up out here" (via The People Gallery) pic.twitter.com/Uble0Ttkl6
2024 წლის ივნისში ჰარლემელმა რეპერმა გამოაცხადა, რომ ალბომი 30 აგვისტოს გამოვიდოდა და ტრეილერიც კი გაავრცელა, თუმცა, საბოლოოდ, გამოშვების თარიღი გადადო. ოფიციალური მიზეზი არ განუმარტავს, მაგრამ იმ პერიოდში ის სასამართლო პროცესისთვის ემზადებოდა – რეპერს ბრალი ყოფილი მეგობრის, Relli-სთვის ცეცხლსასროლი იარაღით სროლაში ედებოდა.
სამკვირიანი სასამართლო პროცესის შემდეგ არტისტი საბოლოოდ გაამართლეს, თუმცა ალბომის გამოშვების თარიღი ისევ უცნობია. GQ-სთვის მიცემულ ინტერვიუში A$AP Rocky-მ განაცხადა, რომ ალბომი დასრულების ეტაპზეა. „ახლა მიქსინგისა და მასტერინგის პროცესში ვარ,“ – აღნიშნა მან. „მაგრამ გულწრფელად რომ ვთქვა, მგონია, ხალხს ალბომის შესახებ სიახლეების მოსმენა აღარ სურს.” რეპერის თქმით, მის ფანებს უბრალოდ მისი მოსმენა სურთ. „არავის აინტერესებს, რა ეტაპზეა ალბომი,” – აღნიშნა A$AP Rocky-მ.
