კანიე უესტმა ახალი სიმღერა გამოსცა, რომელშიც თავისი ქალიშვილი ნორს უესტი და Diddy მონაწილეობენ. სიმღერა, სახელწოდებით Lonely Roads Still Go to Sunshine, 47 წლის რეპერმა 15 მარტს პლატფორმა X-ზე გამოაქვეყნა.
„Lonely Roads Still Go to Sunshine – პაფ დედის ახალი სიმღერა, რომელშიც მისი ვაჟი KING COMBS და ჩემი ქალიშვილი ნორს უესტი მონაწილეობენ, ასევე Yeezy-ს ახალი არტისტი ჩიკაგოდან – ჟასმინ უილიამსი,” – დაწერა რეპერმა.
ხუთწუთიანი სიმღერა იწყება დიალოგით, რომელიც, როგორც ჩანს, კანიესა და Diddy-ს სატელეფონო საუბარია:
„მინდა, დიდი მადლობა გადაგიხადო იმისთვის, რომ ჩემს შვილებზე ზრუნავ,” – ისმის Diddy-ს ხმა. „არავინ ეხმიანება მათ, არავინ ურეკავს.” კანიე კი პასუხობს: „ძალიან მიყვარხარ. შენ გამზარდე – მაშინაც კი, როცა არ გიცნობდი. ხვდები, ხომ რასაც ვამბობ?”
სიმღერაში უესტის 11 წლის ქალიშვილი ნორსიც მონაწილეობს, რომელიც რეპავს: „ვაკეთებ იმას, რაც მინდა და ეს არის მთავარი ცხოვრებაში.”
Lonely Roads Still Go to Sunshine-ის გამოცემამდე უესტმა მისი და ნორსის დედის, კიმ კარდაშიანის დიალოგის უკვე წაშლილი ფოტოები გააზიარა. TMZ-ის ცნობით, ტექსტებში კარდაშიანი ყოფილ მეუღლეს წერდა, რომ მან მათი ქალიშვილის სახელი დააპატენტა იმისთვის, რომ ამ სიმღერის გამოშვება დაებლოკა.
„მე გკითხე, თუ შემეძლო მისი სახელის დაპატენტება. შენ დამეთანხმე. როცა 18 წლის გახდება, ყველაფერი მის ხელში გადავა. ასე რომ, გაჩერდი,” – წერდა, გადმოცემის თანახმად, კარდაშიანი. „მე გავგზავნე დოკუმენტები, რათა მან ვერ შეძლოს Diddy-ს სიმღერაში მონაწილეობა და დავიცვა ის. პატენტი ერთ ადამიანს უნდა ჰქონდეს და ჩვენ შევთანხმდით, რომ ჩვენი შვილების სახელების განმკარგველი მე ვიქნებოდი იმისთვის, რომ ვერავინ შეძლოს მათი გამოყენება.”
უესტი კი პასუხობდა: „მომეცი, თორემ ომს დავიწყებ და ამ საჯარო დაცემიდან ვერც ერთი ჩვენგანი ვეღარ აღდგება. ჩემი მოკვლა მოგიწევს.”
ცოტა ხნის წინ რეპერმა სოციალურ ქსელში სიძულვილის ენის შემცველი ანტისემიტური განცხადებები გამოაქვეყნა. მან ასევე მხარი დაუჭირა Diddy-ს და დონალდ ტრამპს მისი განთავისუფლება სთხოვა: „თავისუფლება პაფს. დონალდ ტრამპ, გთხოვ, გაათავისუფლე ჩემი ძმა პაფი.”
ახალი სიმღერის გარდა, უესტმა X-ზე ფოტოც დადო, რომელიც, მისი თქმით, მომავალი ალბომის ქავერი იქნება. ფოტოზე შავ ფონზე წითელი „სვასტიკაა” გამოსახული. ამ ეტაპზე უცნობია, უკავშირდება თუ არა აღნიშნული ფოტო ალბომს Bully, რომელიც რეპერმა წლის დასაწყისში დააანონსა.
