Fleetwood Mac-ის გიტარისტი ლინდსი ბაკინგემი ყოფილ ბენდის წევრს, მიკ ფლიტვუდს ხმის ჩამწერ სტუდიაში უერთდება. წყვილის მუსიკალურ თანამშრომლობაზე შვედმა პროდიუსერმა კარლ ფალკმა დაწერა, რომელმაც მუსიკოსების ფოტო გააზიარა სტუდიიდან, სადაც ფლიტვუდი ახალ სოლო ალბომზე მუშაობს.
„ცოტა არარეალური მომენტია ლინდსი ბაკინგემთან და მიკ ფლიტვუდთან ერთად ჯდომა, როცა ლინდსი უკრავს იმ ალბომისთვის, რომელზეც ვმუშაობთ. ასევე ლინდსის გულწრფელი ბედნიერების ნახვა მიკის გამო, რომელიც ბოლოს და ბოლოს თავის ალბომს უშვებს, ლინდსი კი მისთვის გიტარის პარტიას ასრულებს და მღერის. ერთი სული მაქვს, როდის დავასრულებთ მუშაობას.”
მეორე პოსტში კი ფალკმა ბაკინგემის ფოტო დადო გიტარით ხელში. „მიკი და ლინდსი ისევ ერთად. უზადო გიტარისტი,” – დაწერა მან. თავად ფლიტვუდს ალბომის ან მისი გამოსვლის თარიღის შესახებ ოფიციალური დეტალები ამ დრომდე არ დაუანონსებია.
ფლიტვუდი Fleetwood Mac-ის ერთ-ერთი დამფუძნებელია გიტარისტ პიტერ გრინთან და ბასისტ ჯონ მაკვისთან ერთად. მთელი კარიერის განმავლობაში ის ჯგუფის პერკუსიონისტი იყო. ბაკინგემი ჯგუფს მომღერალ სტივი ნიკსთან ერთად 1974 წელს შეუერთდა, როგორც გიტარისტი და ვოკალისტი. ეს ჯგუფის ყველაზე ცნობილი შემდგენლობა იყო მაკვის მაშინდელ მეუღლესთან, კრისტინთან ერთად.
ბაკინგემი ჯგუფიდან 1987 წელს წავიდა, თუმცა 1997 წელს დაბრუნდა და ბენდში 2018 წლამდე დარჩა.
„სამწუხაროდ, ვტოვებ ჩემს 43 წლის ბენდს, Fleetwood Mac-ს. ეს არ იყო ჩემი არჩევანი, – განაცხადა მან კონცერტის დროს.
საბოლოოდ Fleetwood Mac 2022 წელს, კრისტინ მაკვის გარდაცვალების შემდეგ დაიშალა.
