2022 წლის ოსკარის დაჯილდოება უილ სმიტისთვის ზღვა ემოციებით სავსე ცერემონიად იქცა, ამ წელს მან საუკეთესო მსახიობის ჯილდო მოიპოვა ფილმისთვის King Richard, მაგრამ ამავე დროს, სცენაზე სკანდალური ინციდენტიც მოხდა, როდესაც წამყვან კრის როკს მისი მეუღლის, ჯადა პიკეტ-სმიტის შესახებ ხუმრობის გამო სახეში სილა გაარტყა.
ამის შემდეგ უილ სმიტს ოსკარის დაჯილდოებაზე 10 წლით აეკრძალა დასწრება, მსახიობსა და რეპერს ჰქონდა გასაჩივრების უფლებაც. 24 მარტს უილ სმიტს Associated Press შეხვდა, სადაც მან
საკუთარ ქმედებებზე იმსჯელა.:
„ვეცდები, ვიყო საუკეთესო ადამიანი და რადაც არ უნდა დამიჯდეს მივიღებ იმას რაც გზაზე წინ დამხვდება.” – განაცხადა უილ სმიტმა.
უილ სმიტმა ინციდენტის შემდეგ კინოსამსახიობო ხელოვნების და მეცნიერების აკადემია დატოვა და კრის როკს საჯაროდ მოუხადა ბოდიში.
„მინდა საჯაროდ გითხრა ბოდიში, კრის. მე გადავაბიჯე ზღვარს, არ ვიყავი მართალი. მრცხვენია, ჩემი ქმედებები კი არ გამოხატავდა იმ ადამიანს, რომელიც მინდა ვიყო.” – დაწერა სმიტმა 2022 წელს.
რაც შეეხება კრის როკს, მას არ დაუფიქსირებია უილ სმიტთან საუბრის სურვილი, თუმცა უნდა ითქვას, რომ მომავალში ოსკარის წამყვანის ამპლუის როლში დაბრუნებას კომიკოსი არ გამორიცხავს.
„არასოდეს იცი, რა შეიძლება მოხდეს. რისი თქმაც შემიძლია, არის ის, რომ დედამიწაზე ყველაზე უბედური ადამიანები ისინი არიან, ვისაც პატიება არ შეუძლია, მე ამას მხოლოდ სხვების გასაგონად არ ვამბობ, ზოგჯერ საკუთარ თავსაც უნდა აპატიო.” – განაცხადა კრის როკმა მარტის დასაწყისში.
უილ სმიტი მუსიკალურ კარიერაში 20-წლიანი პაუზის შემდეგ ახალი ალბომით – Based On a True Story-ით ბრუნდება.
ალბომი ოფიციალურად 28 მარტს გამოვა. ზაფხულში კი სმიტი ევროპასა და ბრიტანეთში საკონცერტო ტურნეს დაწყებას გეგმავს.
“საკუთარ თავში ისეთი რამ აღმოვაჩინე, რასაც შეიძლება, ხელოვნების და ტკივილის გააზრების წყარო ეწოდოს, ეს რაღაც არ ჰგავს არაფერს, რაც აქამდე გამომიცდია, მისი არსებობა აქამდე არც მიგრძნია, ოსკარების შემდეგ ეს სულიერი ძიება გაგრძელდა, ჩემში სრულიად სხვა სამყარომ გაიღვიძა. აღმოვაჩინე ახალი რამ, რაზეც თუნდაც სამი წლის წინ წარმოდგენაც არ მქონდა. სიზმრები, ხილვები – ეს ჩემი შინაგანი სამყაროს ნაწილებია. ეს ყველაფერი კი ძლიერი სურვილის საწინდარი იყო, რათა
გამეზიარებინა ხალხისთვის ის, რასაც მე ვხედავდი და განვიცდიდი. სწორედ ეს სურვილი გახდა ჩემი მუსიკის მთავარი საყრდენი.” – განუცხადა სმიტმა Billboard-ს იანვარში.
