დუა ლიპამ გრემის მფლობელი მეორე ალბომის, Future Nostalgia-ს მეხუთე წლისთავის აღსანიშნად მისი ერთ-ერთი ყველაზე ცნობილი ჰიტის, Physical-ის რემიქსი გამოსცა. სიმღერის ახალ ვერსიაზე მან ავსტრალიელ პოპვარსკვლავ ტროი სივანთან ითანამშრომლა, რომელიც Physical-ს ახალი ინტერპრეტაციით აცოცხლებს.
აღნიშნული რემიქსი 28 მარტს Future Nostalgia-ს განახლებულ ვინილთან ერთად, ალბომის საიუბილეო თარიღის აღსანიშნად გამოვიდა.
დუა ლიპამ რემიქსის შესახებ ინფორმაცია პირველად მელბურნში, 22 მარტს გამართულ შოუზე გაასაჯაროვა, როცა სცენაზე მოულოდნელად ავსტრალიელი პოპვარსკვლავი ტროი სივანი მიიწვია და მასთან ერთად სინგლი Rush შეასრულა.
დუეტის შემდეგ მათ შოუზე მყოფ ერთ იღბლიან გულშემატკივარს სპეციალური USB-დრაივი აჩუქეს, რომელშიც უცნობი ტრეკი ინახებოდა.
აღნიშული რემიქსი სწორედ მაშინ გავრცელდა, როცა დუა ლიპა ავსტრალიაში Radical Optimism-ის მსოფლიო ტურნეს ფარგლებში იმყოფებოდა. აღსანიშნავია, რომ მელბურნის Rod Laver Arena-ზე ტურნეში შემავალი ხუთივე შოუს ბილეთი სრულად გაიყიდა.
მიმდინარე კონცერტებზე დუა ლიპამ ავსტრალიელი ვარსკვლავების სიმღერები შეასრულა, მათ შორის არიან კაილი მინოუგი (Can’t Get You Out of My Head), ნატალი იმბრულია (Torn) და AC/DC (Highway to Hell).
დუა ლიპა ავსტრალიის შემდეგ Radical Optimism-ის ტურნეს გაგრძელებას ევროპასა და ბრიტანეთში გეგმავს. მათ შორის, ლონდონის Wembley Stadium-ზე ივნისში ორი გრანდიოზული შოუ გაიმართება.
ავსტრალიელ პოპვარსკვლავს ტროი სივანს 2025 წელს დიდი გეგმები აქვს, იგი Charli XCX-სა და საბრინა კარპენტერთად ერთად Primavera Sound 2025-ისთვის (ბარსელონა) ემზადება, სადაც სამივე არტისტი ერთ სცენაზე სპეციალური შოუს დადგმას აპირებენ.
მოისმინეთ დუა ლიპასა და ტროი სივანის Physical-ის რემიქს ვერსია:
