ცოტა ხნის წინ The Hollywood Reporter-მა ინფორმაცია გაავრცელა, რის თანახმადაც ბილი აილიშსა და ფინეას ახალი მენეჯმენტი ჰყავთ. აქამდე მათ Best Friends-ის თანადამფუძნებლები დენი რუკასინი და ბრენდონ გუდმანი უწევდნენ მენეჯმენტს. მათ Best Friends 2019 წელს დააარსეს, რომელიც გამომცემლობის, მენეჯმენტისა და ხმის ჩამწერი ინდუსტრიის წამყვან კომპანიად იქცა. კომპანიას ხელშეკრულებები გაფორმებული აქვს Bishop Briggs-თან, Role Model-თან, Mimi Webb-თან და სხვა ცნობილ არტისტებთან.
Sandbox Entertainment-ის CEO ჯეისონ ოუენი დიდი ხანია, ქანთრის ვარსკვლავ კელსი ბალერინისთან და ქეისი მასგრეივსთან თანამშრომლობს. გასულ კვირას Sandbox Entertainment-ის არტისტებმა Academy of Country Music Awards-ის ხუთი ჯილდო მიიღეს. მათ შორის წლის საუკეთესო შემსრულებლის (ბალერინი) და ქალი არტისტის (ბალერინი და მასგრეივსი) ნომინაციებში.
რუკასინთან და გუდმანთან თანამშრომლობის პერიოდში ბილი აილიშის 44 სიმღერა Hot 100-ში შევიდა. მათ შორის N1 ჰიტი Bad Guy. ბილი აილიშს გრემის 32 ნომინაცია და 9 გამარჯვება აქვს მიღებული. აილიშმა და ფინეასმა ასევე მოიგეს ორი ოსკარი – No Time to Die (ჯეიმს ბონდის ამავე სახელწოდების ფილმის საუნდტრეკისთვის) და What Was I Made For? საუნდტრეკი ფილმისთვის – Barbie.
რაც შეეხება ფინეასს, მას გრემის 21 ნომინაცია და 10 გამარჯვება აქვს მიღებული.
მომდევნო თვეს ბილი აილიში მესამე სტუდიური ალბომის Hit Me Hard and Soft მხარდასაჭერ ტურნეს აგრძელებს. ალბომს Billboard 200-ში მეორე ადგილი უჭირავს.
