Billboard Women in Music 2025-ზე ერიკა ბადუს წლის საკულტო პერსონის ტიტული მიენიჭა. სცენაზე მუსიკოსი სამერ უოლკერმა წარადგინა. ბადუმ კი დრო არ დაკარგა და სწრაფად გადავიდა ღონისძიების მთავარ არსზე.
„ეს ღამე ჩვენთვისაა! ეს ღამე არის იმისთვის, რომ ვიზეიმოთ დედამიწისა და სიცოცხლის წიაღი. პლანეტაზე ყველაზე ჭკვიანი არსება, ყველაზე ბრძენი, უძლეველი, სექსუალური, სუფთა და დახვეწილი – ეს არის ქალი. მინდა მადლობა გადავუხადო ღმერთს, რომ ქალად დაბადების საშუალება მომცა!” – აღნიშნა მუსიკოსმა.
ხუთი გრემის მფლობელმა ბადუმ ცერემონიაზე მისი 2007 წლის სიმღერა Annie Don’t Wear No Panties შეასრულა იმ უნიკალური და ეკლექტური სტილით, რომელმაც ის გავლენიან ავტორ-შემსრულებლად აქცია 1997 წელს, სადებიუტო ალბომ Baduizm-ის გამოსვლისთანავე.
სამერ უოლკერმა კი, რომელმაც ბადუს ხელოვნებას „უშიშარი არტისტიზმი” უწოდა, აუდიტორიას გაუზიარა, რომ ჯერ კიდევ 12 წლიდან ის მისი საყვარელი არტისტი იყო და რომ სწორედ მრავალსახოვანი ბადუ იყო ის ბებიაქალი, ვინც უოლკერის ტყუპი ვაჟები ქვეყნად მოავლინა.
სიტყვით გამოსვლისას ბადუმ მადლობა გადაუხადა ყველა დედას: „მინდა დედაჩემს და ყველა დედას მადლობა გადავუხადო. მის ტინა ნოულს, თქვენ ძალიან კარგად თქვით. ვხედავ Doechii-ს დედას, ყველა დედას. მადლობა თქვენ, რომ მოგვეცით ამდენი შთაგონება და მაგალითი, თუ რას ნიშნავს, იყო შეუპოვარი; რას ნიშნავს, შენს თავზე აიღო მართვის სადავეები; რას ნიშნავს, იყო მამაცი და რას ნიშნავს, იყო ის, ვინც ხარ. და ეს არის ყველაფერი ის, რასაც ჩვენ გავაკეთებთ. ეს არის ის, ვინც მინდა, რომ ვიყო.”
ბოლოს კი მუსიკოსმა თავის ქალიშვილთან დაკავშირებული ისტორია გაიხსენა: „ბევრი არაფერი მაქვს სათქმელი, მაგრამ მინდა, ამ ამბით დავასრულო. ჩემი ქალიშვილი აქ არის. მისი სახელია პუმა. ჩემი დაც აქ არის და ეს ორივე თქვენგანისთვისაა. ერთხელ ჩემს უმცროს ქალიშვილ მარსს ვაბანავებდი. მაშინ ის ოთხი წლის იყო. ბანაობის დროს ხომ ბავშვებს თან რაღაცებს ვასწავლით. ვეუბნები: „ეს არის ვაგინა. ეს არის ყველაზე მნიშვნელოვანი რამ პლანეტაზე.” მარსმა კი თავისი დიდი ყავისფერი თვალებით შემომხედა და მითხრა: „მართლა? და სად არის პლანეტის ვაგინა?” რასაც Billboard Women in Music-ის მთელი აუდიტორიის სიცილი მოჰყვა.
ნახეთ ერიკა ბადუს სიტყვით გამოსვლა Billboard Women in Music 2025-ზე:
