ჯგუფ Mechanical Rainbow-ს ახალი სიმღერა MJERA ბენდმა მუსიკალურ პლატფორმებზე გამოაქვეყნა. სიმღერის ავტორები Mechanical Rainbow-ს წევრები დადუ დონაძე და ცოტნე ბაღდავაძე არიან. “MJERA! – OUT NOW YVELGAN 💫💖💘” – ასე წარადგინეს მუსიკოსებმა თავიანთი ნამუშევარი.
სიმღერა – MJERA პოზიტიურ და ენერგიულ ხასიათს ატარებს. კომპოზიციის ვიზუალური ნაწილი კი ბენდის დამახასიათებელი კომპონენტებით გამოირჩევა, სადაც დინამიკურობა და ანიმაციური ელემენტები ერწყმის ერთმანეთს.
Mechanical Rainbow-ი ვოკალისტი: დადუ დონაძე
“როდესაც თავიდან მუსიკის დაკვრა დავიწყეთ, არ ვიცოდით, საით მივდიოდით და რა მოხდებოდა – დავდგებოდით თუ არ დავდგებოდით დიდ სცენაზე. ამიტომაც, ცოტნეს ყოველთვის ვეკითხებოდი, თუ სჯეროდა ჩვენი მომავლის და ისიც მპასუხობდა – „მჯერა!“ – იმიტომ, რომ მსგავს სიტუაციაში ერთადერთი საშუალებაა, რომ ერთმანეთს დავუჯეროთ. ამ დროს შედეგად არაფერი გვაქვს, მაგრამ რაღაცებს გრძნობ და ნდობაა მთავარი. ამას წლების განმავლობაში ვაკეთებდით ქვეცნობიერად. HOPE.-ის შემდეგ უკვე დავფიქრდით, რომ ამ სახელით სიმღერა უნდა გვქონოდა და მალევე დავიწყეთ მასზე მუშაობა, რამდენიმეჯერ შეიცვალა სიმღერის არანჟირება და აქციების პარალელურად დავდეთ. ბოლომდე საპროტესტო მუხტს არ ატარებს, ეს უფრო იმედის მომცემი გზავნილია ჩვენი მსმენელისადმი, რომ ცვლილებები სწორედ ჩვენზეა დამოკიდებული.“
Mechanical Rainbow ერთ-ერთი გამორჩეული ქართული ბენდია, რომელიც 2018 წელს დაარსდა. ჯგუფი საავტორო სიმღერებს ქმნის და მუდმივ ექსპერიმენტებშია, რაც მათ უნიკალურობას კიდევ ერთხელ უსვამს ხაზს.
მოისმინეთ Mechanical Rainbow-ს ახალი სიმღერა MJERA და ნახეთ ვიდეოკლიპი.
