კენდრიკ ლამარი გახდა პირველი მუსიკოსი, რომელმაც სპორტული სასმელების ბრენდთან, Gatorade-თან ითანამშრომლა. პარასკევს, 18 აპრილს გამოქვეყნდა Gatorade-ის ახალი რეკლამა, სახელწოდებით Lose More. Win More. არაერთი ჯილდოს მფლობელი რეპერი მთელი სარეკლამო რგოლის განმავლობაში სამოტივაციო სიტყვას წარმოთქვამს, ფონად კი მისი ტრეკი Peekaboo ჟღერს. რეკლამაში ვხედავთ NBA-ის ვარსკვლავებს – ლუკა დონჩიჩის და ჯეისონ ტეიტუმს, ასევე WNBA-ს მოთამაშეებს – აჯა უილსონს და კეიტლინ კლარკს.
„რამდენის დაკარგვა შეგიძლია?“ – მიმართავს კენდრიკ ლამარი მაყურებელს, შემდეგ კი იხსენებს ბრენდის ისტორიას 1965 წლის ფლორიდის უნივერსიტეტის საფეხბურთო გუნდთან დაკავშირებით. რეკლამის ბოლოს კადრში თავად არტისტიც ჩნდება.
Sports Business Journal-თან კომენტარში Gatorade-ის მარკეტინგის ხელმძღვანელმა აღნიშნა, რომ კენდრიკ ლამარი მისი შრომისმოყვარეობის, შეუპოვრობისა და საზღვრების გადალახვის უნარის გამო შეირჩა. ბრენდი მის მონაწილეობას ახალგაზრდა აუდიტორიასთან კომუნიკაციის დამყარების ერთ-ერთ საშუალებად განიხილავს.
კენდრიკ ლამარის კარიერაში შემდეგი დიდი ნაბიჯი Grand National Tour-ია, რომელსაც მომღერალ SZA-სთან ერთად გამართავს. ჩრდილოეთ ამერიკასა და ევროპაში დაგეგმილი ტურნე 19 აპრილს მინეაპოლისში დაიწყება და 39 შოუს გააერთიანებს. ტურნე 9 აგვისტოს შვედეთში, სტოკჰოლმში დასრულდება. ტურნეს ფარგლებში მასშტაბური კონცერტებია დაგეგმილი MetLife Stadium-ზე ნიუ ჯერსიში (8 და 9 მაისს) და SoFi Stadium-ზე კალიფორნიაში, ინგლვუდში (24 მაისს).
ტურნეს ფარგლებში გახსნით მუსიკალურ აქტს ცნობილი პროდიუსერი DJ Mustard წარადგენს. ეს კენდრიკ ლამართან ერთად სცენაზე გამოჩენის მეორე შემთხვევა იქნება. პირველად ისინი 2025 წლის თებერვალში, Super Bowl-ის მუსიკალურ შოუზე გამოვიდნენ, სადაც DJ Mustard მოწვეული სტუმრის სტატუსით ვიხილეთ.
იხილეთ Gatorade-ის ახალი რეკლამა კენდრიკ ლამარის მონაწილეობით:
