Billboard
26 აპრილი, 2025
სიმღერის „მე გენდობი შენ” ცოცხალ ვერსიას მუსიკის ჟურნალისტი ლაშა გაბუნია აქვეყნებს.
ლაშა გაბუნიამ სოციალურ ქსელში აქამდე უცნობი ვიდეო გამოაქვეყნა, რომელშიც „შავი პრინცი” და Best History სიმღერას „მე გენდობი შენ” ასრულებენ. ვიდეო 2002 წელს ქუთაისში, კომპილაციური კასეტის „ქართული ტალღა 1” პრეზენტაციაზეა გადაღებული.
ლაშა გაბუნია:
„2002 და 2003 წლებში გამოვიდა ასეთი კომპილაციური კასეტები „ქართული ტალღა 1” და „ქართული ტალღა 2”, რომლებშიც ძირითადად ქუთაისური ჯგუფები მონაწილეობდნენ. ეს ვიდეო კი გადაღებულია ქუთაისში, 2002 წლის 24 მაისის კონცერტზე, რომელიც სწორედ პირველი კასეტის პრეზენტაციას მიეძღვნა. მაშინ თბილისიდან მხოლოდ ლადო ბურდული ჩამოვიდა, სხვა ყველა ქუთაისელი შემსრულებელი იყო. მუსიკოსების გარდა, კონცერტში მონაწილეობდა არტკლუბიც – პოეტებისა და მხატვრების გაერთიანება და იქვე იხატებოდა ამ კასეტის ყდა, რომელიც ბოლოს სცენაზე გამოიტანეს – ყური, რომელზეც კიბე იყო მიდგმული.
რაც შეეხება „შავი პრინცისა” და Best History-ს კოლაბორაციას, სამწუხაროდ, აღნიშნული სიმღერის ჩაწერა და გამოცემა ვერ მოხერხდა და მხოლოდ ამ ცოცხალი შესრულების ვიდეომ შემოინახა, რომელსაც ძალიან დიდხანს ვეძებდი. ბევრი მწერდა სოციალურ ქსელშიც და მთხოვდა, რომ ეს კადრები მეპოვა. იცოდნენ, რომ ასეთი დუეტი არსებობდა და ყველა ეძებდა, განსაკუთრებით „შავი პრინცის” გარდაცვალების შემდეგ. ბოლოს გამიმართლა და Best History-ს წევრმა ნიკა სვანიძემ კონცერტის სრული ჩანაწერი მომაწოდა.
თავად სიმღერა ძალიან მძლავრია და ამავდროულად ოდნავ ეპატაჟურიც – შესაძლოა +18-ადაც მივიჩნიოთ. თუმცა ძალიან დიდი დრაივი აქვს და დიდი ენერგია მოდის ორივე შემსრულებლისგან.”
„მე გენდობი შენ” პირველი ვიდეოა, რომელიც კონცერტის ჩანაწერიდან გამოქვეყნდა. ლაშა გაბუნია სამომავლოდ სხვა შემსრულებლების გამოსვლების, საბოლოოდ კი სრული კონცერტის ატვირთვასაც გეგმავს.
„მაგალითად, გოგა ჟორჟოლაძის ცოცხალი გამოსვლების ვიდეომასალა პრაქტიკულად არ არსებობს. ამ ჩანაწერში კი არის და ძალიან მინდა მისი დადება. ასევე არის მხატვრების სიმღერა, რომელსაც ისტერიკული პანკი შეიძლება დავარქვათ. ამ ვიდეოების ცალ-ცალკე დადებას ვგეგმავ, შემდეგ კი ალბათ სრულ ჩანაწერსაც ავტვირთავ.”
მოუსმინეთ კასეტებს „ქართული ტალღა 1” და „ქართული ტალღა 2”:
