მრავალნაწილიანი სიმღერა Flower’s Dream ხანგრძლივი და განვითარებადი ისტორიით გამოირჩევა. ის მომღერალ SophiO-სა და კომპოზიტორისა და მუსიკალური პროდიუსერის, გია ქარჩხაძის ერთობლივი ნამუშევარია. სიმღერის პირველი ნაწილი ჯერ კიდევ 2003 წელს დაიწერა.
გარკვეული პერიოდი არტისტებს მუსიკალური პაუზა ჰქონდათ აღებული, თუმცა საბოლოოდ, სოლო კარიერასთან ერთად მათი თანამშრომლობაც განახლდა. Flower’s Dream რამდენიმე ნაწილისგან შედგება. მეორე, მესამე და მეოთხე მონაკვეთი 2019-დან 2023 წლამდე პერიოდში შეიქმნა, ხოლო სრულყოფილი სახე კომპოზიციას 2024 წელს, საბოლოოდ ჩაწერის შემდეგ მიეცა.
“დიდი ხნის მოლოდინის შემდეგ, თქვენს წინაშეა FLOWER’S DREAM – ოთხნაწილიანი კომპოზიცია, რომლის შექმნასაც მრავალი წლის ისტორია აქვს. მოუსმინეთ Spotify-ზე, Apple Music-ზე და სხვა პლატფორმებზე.” – წერს SophiO სოციალურ მედიაში.
სიმღერის მუსიკა და ტექსტი გია ქარჩხაძეს ეკუთვნის, ვოკალი სოფიო კაკულიას, სასცენო სახელით SophiO, მუსიკალურ ინსტრუმენტებზე უკრავენ: სესილი სანებლიძე – ვიოლინო, ელენე გოგოძე – ვიოლა, სოფიო აფხაზავა-შარაშენიძე – ჩელო, ლევან უგულავა – ფორტეპიანო, გია ქარჩხაძე და ლაშა უგულავა – გიტარა. ბექ-ვოკალს სესილი სანებლიძე, ელენე გოგოძე, ეკა სარალიძე და ანანო სიხარულიძე ასრულებენ. მიქსინგი და მასტერინგი ლაშა უგულავას ეკუთვნის, თავად სიმღერა კი DUO Records-შია ჩაწერილი. კომპოზიციის ყდის დიზაინი თეონა კვაჭაძემ შექმნა, სადაც ვახტანგ გაბუნიას ნახატია გამოყენებული.
სიმღერა Flower’s Dream შინაგანი გამოღვიძებისადმი მიძღვნილი ოდაა და მომავალი ალბომის საკვანძო, კონცეპტუალური ნაწარმოებია. ამ სიმღერის გამოშვებით არტისტები ფართომასშტაბიანი პროექტის დაწყებას აანონსებენ, რაც 2025 წლის ბოლომდე სრული ალბომის გამოცემას და ცოცხალ შესრულებებს გულისხმობს. 10 მაისს მათი კონცერტი ჯაზ კლუბ 1984-ში, ხოლო 31 მაისს ფაბრიკის ე.წ. “რუფტოპზე” გაიმართება. 2026 წლისთვის კი ალბომის მიხედვით თეატრალური წარმოდგენის დადგმა იგეგმება.
მოისმინეთ სიმღერა Flower’s Dream:
