A$AP Rocky-მ პირველად ისაუბრა იარაღით თავდასხმის საქმეზე გამართულ სასამართლო პროცესზე და ის უკიდურესად სტრესულ გამოცდილებად შეაფასა.
ახალ ინტერვიუში, რომელიც Variety-მ 6 მაისს გამოაქვეყნა, რეპერი დეტალურად აღწერს, როგორი განცდა ჰქონდა თებერვალში, სასამართლო დარბაზში ყოფნისას, როცა მისი პროცესი მიმდინარეობდა. A$AP Rocky თავისმა ყოფილმა მეგობარმა, A$AP Relli-მ 2021 წლის ნოემბერში ცეცხლსასროლი იარაღით თავდასხმაში დაადანაშაულა. საბოლოოდ, ის ყველა ბრალდებაში უდანაშაულოდ ცნეს. როგორც რეპერი ამბობს, ბედნიერია, რადგან კვლავ აქვს საკუთარი საქმის კეთების შესაძლებლობა.
ჟურნალისტის კითხვაზე, შიშობდა თუ არა, რომ დამნაშავედ ცნობდნენ, არტისტმა უპასუხა:. „ამაზე არ უნდა იფიქრო, რადგან ასეთი განწყობით, შესაძლოა, შეცდომები დაუშვა. ვცდილობდი, სულ პოზიტიურად მეფიქრა, მაგრამ ცხადია, ეს იყო საშინლად დამთრგუნველი, ნერვებისმომშლელი. თავისუფლების დაკარგვის მართლა მეშინოდა. უზომოდ მადლობელი ვარ, რომ სასამართლომ ასეთი გადაწყვეტილება მიიღო. მადლიერი ვარ მოსამართლის, რომელიც პატივისცემით მეპყრობოდა – როგორც სრულფასოვან მოქალაქეს. მადლობელი ვარ ჩემი გუნდის, ადვოკატის, ოჯახის და დედაჩემის, რომლებიც სულ გვერდში მედგნენ.“
როკიმ ასევე თქვა, რომ სპაიკ ლის მომავალი ფილმის, Highest 2 Lowest-ის პერსონაჟი, რომელსაც თავად განასახიერებს, შთაგონებულია მისი სასამართლო პროცესის გამოცდილებით.
„შევძელი, განმესახიერებინა ადამიანი, რომელსაც დიდხანს მოუწევს ციხეში ყოფნა, მაგრამ ჯერ კიდევ ვერ აცნობიერებს შედეგებს. მე კი რეალურ ცხოვრებაში მქონდა გაცნობიერებული ამის ალბათობა,“ – თქვა რეპერმა და ისიც აღნიშნა, რომ გადაღებები მისთვის „ერთადერთი თავშესაფარი“ იყო სასამართლო დავის პერიოდში.
პროცესის კულმინაციური მომენტი მაშინ დადგა, როცა როკი უდანაშაულოდ ცნეს. გადაწყვეტილების მოსმენის შემდეგ ის რიანას ჩაეხუტა. ეს მომენტი ინტერნეტში ვირუსულად გავრცელდა. როგორც რეპერმა Variety-ს უთხრა, ის წამი გამოხატავდა „სიხარულს, როცა უბრალოდ გინდა, სასამართლოს შენობა სასწრაფოდ დატოვო”.
A$AP Rocky ამჯერად ცხოვრებას სასიამოვნო ამბით აგრძელებს. 2025 წლის Met Gala-ს დაწყებამდე ცოტა ხნით ადრე რიანამ გაამხილა, რომ ის და რეპერი მესამე შვილს ელოდებიან.
