დენ ეიკროიდის ოჯახმა და ჯუდი ბელუში-პისანოს მემკვიდრეებმა ოფიციალურად დააანონსეს Blues Brothers-ის პირველი გრაფიკული რომანი, სახელწოდებით – The Blues Brothers: The Escape of Joliet Jake. პროექტი იმ დიდი გეგმის ნაწილია, რომელიც ითვალისწინებს Blues Brothers-ის სამყაროს გაფართოებას სატელევიზიო შოუების, ფილმების, ცოცხალი ღონისძიებებისა და მუსიკის მეშვეობით.
გრაფიკული რომანის ავტორები არიან სტელა ეიკროიდი, ლუკ პისანო და ჯეიმს ვერნერი, ილუსტრაციებზე კი ბრაზილიელი არტისტი ფელიპე სობრეირო მუშაობს. პროექტის შემქმნელების აღწერით, ეს არის „სიყვარულით სავსე გზავნილი“ და ფილმის ერთგვარი გაგრძელება. წიგნს Z2 გამოსცემს, რომელიც მუსიკალურ პროექტებზე დაფუძნებული გრაფიკული რომანებითაა ცნობილი.
დენ ეიკროიდი, რომელმაც Blues Brothers ჯონ ბელუშისთან ერთად შექმნა, პროექტს სარედაქციო ზედამხედველობას გაუწევს და წიგნის წინასიტყვაობასაც თავად დაწერს.
„ელვუდი და ჯეიკი ჩემთვის ძალიან ძვირფასები არიან. სიმართლე გითხრათ, ერთ-ერთი მათგანი მამაჩემია,” — უთხრა სტელა ეიკროიდმა ჟურნალ Deadline-ს.
რომანი პატივს მიაგებს ჯუდი ბელუში-პისანოს, რომელიც 2024 წლის ივლისში გარდაიცვალა. ის 40 წელზე მეტ ხანს მუშაობდა Blues Brothers-ის მემკვიდრეობის შენარჩუნებასა და განვითარებაზე. ლუკ პისანოსა და შემოქმედებითი ჯგუფის თქმით, წიგნი ემყარება რეალურ ისტორიებს და გამოცდილებებს ჯუდის, ჯონისა და დენის ცხოვრებიდან.
Z2-ის პრეზიდენტმა ჯოშ ბერნშტაინმა Blues Brothers „კომედიის, პოპკულტურის და მუსიკის ლეგენდებად“ მოიხსენია და დასძინა, რომ მკითხველს „ჯეიკისა და ელვუდის ეპიკური დაბრუნება“ ელის.
The Blues Brothers: The Escape of Joliet Jake წინასწარი შეკვეთით ხელმისაწვდომი იქნება Amazon-ზე, Barnes & Noble-ზე, წიგნების, კომიქსებისა და მუსიკალური ჩანაწერების მაღაზიებში.
