ფრანგული ბენდი L’Impératrice პარიზში 2012 წელს დაარსდა და მალევე თანამედროვე მუსიკალური სცენის ერთ-ერთ გამორჩეულ ჯგუფად იქცა. ბენდმა მსმენელის ყურადღება ავთენტური ჟღერადობითა და ელექტრო-დისკო ექსპერიმენტებით მიიპყრო. მათი მუსიკა უმეტესად ფანკის, სინთი-პოპის და ელექტრონული ჟანრების სინთეზს წარმოადგენს. L’Impératrice გამოდიოდა ისეთ ცნობილ ფესტივალებზე, როგორებიცაა: Coachella, Primavera Sound და Outside Lands.
კარიერის განმავლობაში ბენდმა სამი სტუდიური ალბომი და არაერთი ჰიტი გამოსცა. Vanille Fraise, Peur des filles და Agitations tropicales – ეს სწორედ ის კომპოზიციებია, რომლებმაც მათ გლობალურ მუსიკალურ სივრცეში დაუმკვიდრა ადგილი.
2024 წელს ჯგუფი სცენაზე მნიშვნელოვანი სიახლით, ახალ ვოკალისტთან ერთად ახალი ალბომით დაბრუნდა. Pulsar სრულად ავთენტური ალბომია, რომელიც ფანკს, დისკოსა და დიფ ჰაუსს აერთიანებს. ამ მუსიკალური ექსპერიმენტით ჯგუფმა ახლებური, განსხვავებული ჟღერადობა შექმნა.
L’Impératrice თბილისს სწორედ ამ ალბომის ფარგლებში გამართული ტურით ეწვევა. უნიკალური ჟღერადობითა და სცენური ენერგიით ცნობილი ფრანგული ჯგუფი ქართველი მსმენელის წინაშე 6 სექტემბერს წარდგება.
ღონისძიება District 4-ში, ინდუსტრიული სტილის სივრცეში გაიმართება, რომელიც დამოუკიდებელი ხელოვნებისა და მუსიკის განვითარებას უწყობს ხელს.
ბილეთების შეძენა 22 მაისიდან პლატფორმა TKT.ge-ზე იქნება შესაძლებელი. ღონისძიების ორგანიზატორია Music Cookz – ახალი ქართული კომუნა, რომელიც შთამბეჭდავი მუსიკალური ღონისძიებების სერიას ქმნის. L’imperatrice-ის ლაივი კი ამ სერიის პირველი ღონისძიებაა.
