თითქმის ოთხი ათწლეულის შემდეგ საფრანგეთის პოლიციამ The Doors-ის სოლისტის, ჯიმ მორისონის საფლავიდან მოპარული ბიუსტი იპოვა. სკულპტურა, რომლის ავტორი ხორვატიელი არტისტი მლადენ მიკულინია, მორისონის საფლავზე 1981 წლის 3 ივლისს, მუსიკოსის გარდაცვალებიდან 10 წლის თავზე დაიდგა. შვიდი წლის შემდეგ კი, 1988 წლის მაისში, ბიუსტი მოიპარეს. Vanity Fair-ის ინფორმაციით, სკულპტურა ორმა პირმა წაიღო, რომლებმაც ღამე სასაფლაოზე გაატარეს.
წლების განმავლობაში ვრცელდებოდა ჭორები, თუ რა ბედი ეწია ბიუსტს. 37 წლის შემდეგ კი პარიზის პოლიციამ განაცხადა, რომ სკულპტურა ნაპოვნია და მისი აღმოჩენა თაღლითობის საქმეზე ჩატარებულ ჩხრეკას უკავშირდება. სხვა დეტალები იმის შესახებ, თუ სად იყო ბიუსტი ამ წლების განმავლობაში, ან დაუბრუნდება თუ არა მის თავდაპირველ ადგილს, არ გახმაურებულა.
მორისონმა მსოფლიო აღიარება 60-იან წლებში The Doors-ის სოლისტის რანგში მოიპოვა. ოთხი წლის განმავლობაში ჯგუფმა ექვსი ალბომის გამოცემა მოახერხა. 1967 წელს ბენდის სახელწოდებით გამოშვებული სადებიუტო ალბომი Billboard 200-ის ლიდერი გახდა, მისი სიმღერა Light My Fire კი Hot 100-ის პირველ ადგილზე გავიდა. ყველა ალბომი, რომელიც მორისონის სიცოცხლეში გამოვიდა, ჩარტის ტოპ ათეულში მოხვდა.
მორისონი 1971 წლის 3 ივლისს, 27 წლის ასაკში, პარიზში, საეჭვო ვითარებაში გარდაიცვალა. ის პარიზის პერ-ლაშეზის სასაფლაოზე დაკრძალეს.
