კანიე უესტი სამხრეთ კორეაში აღარ იმღერებს, ყოველ შემთხვევაში, ამ თვეში, რადგან მისი კონცერტი, რომელიც 31 მაისს ინჩხონში უნდა გამართულიყო, გაუქმდა. ბილეთების გაყიდვის კორეული პლატფორმის ინფორმაციით, ღონისძიების გაუქმების მიზეზი რეპერის გარშემო არსებული აზრთა სხვადასხვაობაა. მათი მხრიდან დამატებითი დეტალები არ დაკონკრეტებულა.
„ვწუხვართ, გაცნობოთ, რომ კონცერტი YE LIVE IN KOREA, რომელიც 2025 წლის 31 მაისს უნდა გამართულიყო, გაუქმდა იმ აზრთა სხვადასხვაობის გამო, რომელიც არტისტის გარშემოა. გულწრფელად გიხდით ბოდიშს შექმნილი დისკომფორტისთვის და გთხოვთ, რომ გაგვიგოთ. ყველა შეძენილი ბილეთი ავტომატურად გაუქმდება და გადახდილი თანხა უკან დაგიბრუნდებათ.”
ცოტა ხნის წინ უესტი ესპანეთში, მალიორკაზე დააფიქსირეს მეუღლესთან და სტრიმერებთან – Sneako-სა და Digital Nas-თან ერთად. ბოლო თვეების განმავლობაში არტისტი რამდენიმე სკანდალში გაეხვა, სოციალურ მედიაში ანტისემიტური და ანტი-LGBT რიტორიკის გავრცელების გამო. მისი მტკიცებით, სიმღერა Heil Hitler ყველა სტრიმინგ პლატფორმიდან აიღეს.
„Heil Hitler ყველა სტრიმინგ პლატფორმამ დაბლოკა,” – დაწერა მუსიკოსმა ტვიტერზე. „მაშინ, როცა რენდი ნიუმენის Rednecks დღემდე ისტრიმება.”
ბოლო ინტერვიუში არტისტმა პირს მორგანის შოუ სტუდიაში შესვლიდან რამდენიმე წუთში დატოვა. „ვერაფერს დამაკლებთ, ძმაო. მე საჩუქარი ვარ. რატომ იქცევით ხალხიც და მედიაც ისე, თითქოს ჩემი სიმღერები არ დაგიკრავთ ქორწილებში, გამოსაშვებ საღამოებსა თუ გასვენებებზე? ან თქვენი შვილის დაბადებისას? ეს აჩვენებს, თუ რამხელა სიძულვილი გაქვთ ადამიანების მიმართ, რომლებიც სიყვარულს გასცემენ, რადგან ძალიან დიდი სიყვარულია ხელოვნებაში, რომელსაც მე ვქმნი.”
