2023 წელს ჯეიმი ფოქსს სასწრაფო სამედიცინო დახმარება დასჭირდა. დიაგნოზი კი, როგორც მოგვიანებით თავად დაადასტურა, ინსულტი იყო. თუმცა გაურკვევლობის პერიოდში სოციალურ მედიაში მრავალი ჭორი გავრცელდა, მათ შორის ინციდენტში Diddy-ს ჩართულობაზე.
The Hollywood Reporter-თან ახალ ინტერვიუში კი ფოქსმა წერტილი დაუსვა მოარულ ხმებს, თითქოს რეპერმა მისი მკვლელობა სცადა.
„იდეალურ ფორმაში ვარ. გადავაწყდი ისეთ ჭორებს, თითქოს პაფი ჩემს მოკვლას ეცადა. არა, პაფს ჩემი მკვლელობა არ უცდია. როცა თქვეს, რომ მე კლონი ვიყავი, ამან წყობიდან გამომიყვანა. ამ დროს მე ვზივარ საავადმყოფოს საწოლზე და ვფიქრობ: ისინი ჩემს კლონირებას აპირებენ.”
57 წლის მსახიობმა აღნიშნა, რომ საავადმყოფოში ყოფნის დროს მას ნარკოტიკული საშუალებებით ამშვიდებდნენ და, მისი თქმით, ამის გამო, იქ გატარებული კვირები არ ახსოვს.
„საავადმყოფოში ბევრს ვხუმრობდი. ეს ერთადერთი გზა იყო, რომ იმ ყველაფერს გავმკლავებოდი. მე კომიკოსი ვარ, მაშინაც კი, როცა დამამშვიდებლების ზემოქმედების ქვეშ ვიყავი და ოქსიტოცინს, დილანტინსა და მორფინს ერთდროულად მიკეთებდნენ.”
ფოქსი Diddy-ს მიერ მისი მკვლელობის მცდელობასა და მათ მეგობრობაზე გავრცელებულ ჭორებს მანამდე, დეკემბერში, ნეტფლიქსის პროექტში What Had Happened Was გამოეხმაურა.
„ინტერნეტში ამბობდნენ, რომ პაფი ჩემს მოკვლას ცდილობდა. ვიცი, რასაც ფიქრობთ. Diddy? არა, მე მათი წვეულებები ადრე დავტოვე.”
ჭორებს კომბსის წარმომადგენლებიც გამოეხმაურნენ და მათ უცნაური, სასაცილო და უსაფუძვლო უწოდეს.
2023 წლის აპრილში ფოქსის ქალიშვილმა გაამხილა, რომ „ნეტფლიქსის” ფილმის, Back in Action-ის გადაღების დროს მსახიობი საავადმყოფოში გადაიყვანეს. ფოქსმა საბოლოოდ განმარტა, რომ ტვინში სისხლდენამ ინსულტი გამოიწვია მას შემდეგ, რაც თქვა, რომ თავის ტკივილი აწუხებდა. მედდის ინფორმაციით, მსახიობის გადარჩენის შანსი მხოლოდ ხუთ პროცენტს შეადგენდა.
ოსკაროსანმა მსახიობმა საავადმყოფოში თითქმის ერთი თვე გაატარა. მოგვიანებით მან აღნიშნა, რომ მთელი ეს პერიოდი სიკვდილის პირას იდგა.
