კენდრიკ ლამარმა GNX-ის ეპოქას კიდევ ერთო წარმატება შემატა – მისი ნამუშევარი იქცა მესამე ალბომად, რომელიც Billboard-ის Rhythmic Airplay ჩარტის პირველ ადგილზე ოთხი ჰიტით მოხვდა. ამ შედეგს ალბომმა 31 მაისით დათარიღებულ ჩარტში მიაღწია, როცა Peekaboo-მ მეოთხე ადგილიდან პირველზე გადაინაცვლა. ამ შედეგით GNX გაუთანაბრდა ისეთ ალბომებს, როგორებიც არის Doja Cat-ის Planet Her და SZA-ს SOS. ჩარტის 32-წლიანი ისტორიის განმავლობაში სწორედ ამ სამი ალბომის ყველაზე მეტი ჰიტი მოხვდა პირველ ადგილზე.
Peekaboo 16-22 მაისის მონაკვეთში გახდა ყველაზე ხშირად გაშვებული სიმღერა აშშ-ის იმ რადიოსადგურებში, რომელთა მონაცემებსაც ეს ჩარტი ეყრდნობა. ტრეკის გაჟღერების სიხშირე წინა კვირასთან შედარებით 19%-ით არის გაზრდილი, რის გამოც ის კვირის „Greatest Gainer“-ის ტიტულის მფლობელი გახდა. ეს სტატუსი ენიჭება იმ სიმღერას, რომელსაც რადიოეთერებში გაშვების რაოდენობით ყველაზე დიდი ზრდა აქვს.
Peekaboo-მ ლიდერობა ჩამოართვა დრეიკის სიმღერას Nokia, რომელიც ბოლო ორი კვირის განმავლობაში პირველ ადგილს იკავებდა. ლამარსა და დრეიკს შორის ასეთი მეტოქეობა კიდევ ერთხელ უსვამს ხაზს მათ დაპირისპირებას, რომელიც 2024 წლის ერთ-ერთ უმნიშვნელოვანეს პოპკულტურულ მოვლენად იქცა. Nokia ამჟამად მეორე ადგილს იკავებს. მისი გაშვების მაჩვენებელი 8%-ით არის შემცირებული.
Peekaboo-ს წარმატებასთან ერთად ლამარი Rhythmic Airplay ჩარტში მეთერთმეტედ იკავებს პირველ ადგილს. იხილეთ ლამარის ჰიტების სია, რომლებიც სხვადასხვა დროს Rhythmic Airplay-ს ჩარტის ლიდერად იქცა:
Humble – 2017 წელი
Loyalty feat. Rihanna – 2017 წელი
Love. feat. Zacari – 2017 წელი
Pray for Me feat. The Weeknd – 2018 წელი
Like That feat. Future, Metro Boomin – 2024 წელი
Not Like Us – 2024 წელი
Squabble Up – 2025 წელი
TV Off feat. Lefty Gunplay – 2025 წელი
Luther feat. SZA – 2025 წელი
30 for 30 feat. SZA – 2025 წელი
Peekaboo feat. AzChike – 2025 წელი
