50 Cent უწინდებურად სარკასტულია Diddy-ს მიმართ და სასამართლო პროცესის პარალელურად სოციალურ ქსელში ხელოვნური ინტელექტის გამოყენებით შექმნილ პოსტებს აქვეყნებს.
ამჯერად რეპერი გამოეხმაურა ფაქტს, რომ მისი სახელი Diddy-ს ყოფილმა ასისტენტმა, კაპრიკორნ კლარკმა, სასამართლო ჩვენების დროს ახსენა. კლარკმა პროკურორებს უამბო იმ დროზე, როცა მისი ყოფილი უფროსი იარაღს ატარებდა, რადგან „50 Cent-თან პრობლემა ჰქონდა“.
50 Cent-მა ჯერ AI-ით გენერირებული ფოტო გამოაქვეყნა, რომელშიც ის პიჯაკში გამოწყობილი დგას გადასაღებ მოედანზე. „PUFFY-ს იარაღი აქვს?! ვერ ვიჯერებ! თავს უსაფრთხოდ არ ვგრძნობ,“ – ვკითხულობთ ფოტოს აღწერაში.
შემდეგ მან კიდევ ერთი AI-ფოტო გამოაქვეყნა, რომელშიც შეშინებული სახე აქვს. ფოტოს შემდეგი წარწერა ახლავს: „ღმერთო ჩემო, პატარა Diddy-ს უნდა, რომ მოვკვდე. ჯობს სადმე დავიმალო.”
შაბათ-კვირას 50 Cent-მა AI-ით შექმნილი კიდევ ერთი ფოტო გამოაქვეყნა – ამჯერად მასზე გამოსახული იყო ჭაღარა Diddy სასამართლო დარბაზში. „მე ფსონს ვდებ, რომ Diddy-ს 20 წელს მიუსჯიან. მას მეგობრებმა უბრალოდ თავი აარიდეს. SMH BadBoy Dangerous!“ – წერს რეპერი.
გასულ კვირას 50 Cent-მა იმ ადამიანებს დასცინა, რომლებიც თითქოს მანჰეტენის ფედერალური სასამართლოს წინ „Free Diddy“-ს წარწერიანი მაისურებით დგანან. რეპერის თქმით, ამისთვის მათ საათში 20 დოლარს უხდიან. 50 Cent-მა AI-ის გამოყენებით გენერირებული ფოტოც გამოაქვეყნა, რომელშიც ასეთი მაისური თავად აცვია.
