კრის მარტინი და დაკოტა ჯონსონი რვაწლიანი ურთიერთობის შემდეგ საბოლოოდ დაშორდნენ ერთმანეთს – ამის შესახებ ჟურნალი People იუწყება. გამოცემის ცნობით, Coldplay-ს 48 წლის ფრონტმენისა და 35 წლის მსახიობის ურთიერთობა სულ ახლახან დასრულდა. ეს ამბავი მას შემდეგ გავრცელდა, რაც წყვილი მაისის შუა რიცხვებში ერთად დააფიქსირეს მალიბუში – ქალაქში, სადაც ისინი 2021 წლიდან ერთად ცხოვრობდნენ.
Billboard-მა კომენტარისთვის მარტინისა და ჯონსონის წარმომადგენლებს მიმართა.
წყვილის ურთიერთობა 2017 წელს დაიწყო. 2024 წელს People-მა დაწერა, რომ ისინი უკვე წლებია, საიდუმლოდ დანიშნული არიან, თუმცა დაქორწინებას არ ჩქარობდნენ. მიუხედავად იმისა, რომ ვარსკვლავები ურთიერთობას საჯარო სივრცისგან მაქსიმალურად დისტანცირებულად ტოვებდნენ, წლების განმავლობაში საზოგადოებას რამდენიმე წუთით მაინც გაუზიარეს თავიანთი რომანტიკული მომენტები. 2022 წლის იანვარში მარტინი მოულოდნელად გამოჩნდა ჯონსონის Zoom-ის შეხვედრაზე, როდესაც მსახიობი ფილმ Cha Cha Real Smooth-ის კამპანიაში იყო ჩართული. ამ შემთხვევამდე რამდენიმე თვით ადრე კი, Coldplay-ის ლონდონში გამართულ კონცერტზე, მარტინმა ჯონსონს სცენიდან საჯაროდ მიმართა და სიმღერა მიუძღვნა.
„ეს სიმღერა ჩემს სამყაროზეა. და ის აქ არის,“ – თქვა მომღერალმა, როდესაც დარბაზში ჯონსონისკენ მიანიშნა, შემდეგ კი Coldplay-სა და BTS-ის ჰიტი – My Universe შეასრულა, რომელიც Billboard Hot 100-ის ლიდერო იყო.
„ჩვენ უკვე დიდი ხანია, ერთად ვართ. ხანდახან გარეთაც გავდივართ, მაგრამ ორივე იმდენად ვართ ჩაფლული სამუშაოში, რომ სახლში ყოფნა, სიმყუდროვე და პირადი სივრცე ბევრად უფრო გვანიჭებს სიამოვნებას,“ – უთხრა ჯონსონმა Elle UK-ს 2021 წლის დეკემბერში.
მანამ, სანამ კრის მარტინი დაკოტა ჯონსონთან დაიწყებდა ურთიერთობას, 2003-2014 წლებში გუინეტ პელტროუზე იყო დაქორწინებული. მათ ორი შვილი ჰყავთ – 21 წლის ეიფლი და 19 წლის მოსესი. მათ შესახებ ჯონსონმა 2024 წელს Bustle-თან ინტერვიუს დროს ისაუბრა და აღნიშნა, რომ ბავშვები მთელი გულით უყვარს.
თავად ჯონსონს წარსულში ურთიერთობა ჰქონდა მსახიობ ჯორდან მასტერსონთან და მუსიკოს მეთიუ ჰიტთან.
მარტინისა და ჰოლივუდის ვარსკვლავის დაშორების ამბავი Coldplay-ს მასშტაბური Music of the Spheres-ის ტურნეს პარალელურად გავრცელდა. ტურნე აპრილში Top Tours ჩარტის სათავეში მოხვდა. Billboard Boxscore-ის ინფორმაციით, აზიაში გამართულ შოუებზე 502 000 ბილეთი გაიყიდა და ჯგუფს 67.4 მილიონი დოლარის შემოსავალი მოუტანა. Coldplay-ს ბოლო ალბომი Moon Music 2024 წლის ოქტომბერში გამოვიდა და Billboard 200-ის პირველი ადგილი დაიკავა.
