მას შემდეგ, რაც საბრინა კარპენტერის ჰიტებმა Espresso, Please Please Please და Taste ჩარტებში დიდი წარმატება მოიპოვა, 6 ივნისს მომღერალმა ახალი ჰიტი Manchild გამოუშვა. სიმღერას ირონიულ-სატირული ტექსტი აქვს. რამდენიმე დღით ადრე ქუჩებში სიმღერის თიზერ ბანერები გამოჩნდა, წარწერით – Hey men! და „ვფიცავ, ისინი მირჩევენ, მე არ ვირჩევ მათ.“
„ეს შენზეა!!“ – დაწერა გრემის მფლობელმა არტისტმა ინსტაგრამზე 4 ივნისს და სიმღერის გამოსვლა დააანონსა.
მისივე თქმით, Manchild-ს ვიდეოკლიპიც მოჰყვება.
ახალი სიმღერა საბრინა კარპენტერის დიდი მიღწევებით სავსე წლის გაგრძელებაა, – გასული ზაფხულის ჰიტი Espresso არტისტის კარიერაში ყველაზე წარმატებულ ნამუშევრად იქცა. თებერვალში მან Short n’ Sweet-ის დელუქს ვერსია გამოსცა, სადაც შედის ტრეკები: 15 Minutes, Couldn’t Make It Any Harder, Busy Woman და Bad Reviews. ალბომი Billboard 200-ზე პირველ ადგილს ოთხი კვირის განმავლობაში იკავებდა.
კარპენტერმა Short n’ Sweet ალბომის მხარდასაჭერი ტურნე შარშან, სექტემბერში, ჩრდილოეთ ამერიკაში დაიწყო. გაზაფხულზე მომღერალმა ევროპაშიც გამართა რამდენიმე კონცერტი, ტურნე კი ივლისში ლონდონის ჰაიდ პარკში დაგეგმილი ორი გამოსვლით გაგრძელდება.
მოისმინეთ საბრინა კარპენტერის ახალი სიმღერა Manchild:
