სტეფანემ ახალი სიმღერა გამოსცა, სახელწოდებით „შორენა, ნათია, მზია”. მარტივი და დასამახსოვრებელი მელოდია და ტექსტი მოსმენისთანავე შეგიქმნით კარგ განწყობას და დიდი ხნით აგეკვიატებათ.
მუსიკა თავად მომღერალს ეკუთვნის. ტექსტის ავტორი ნიქო გორგილაძეა, რომლისთვისაც, როგორც თავად ამბობს, ეს სიმღერისთვის შექმნილი სადებიუტო ნამუშევარია. სიმღერაში ინტეგრირებულია ერთ-ერთი მთავარი გმირის, მზიას ლექსიც, რომელსაც თიკო სადუნიშვილი კითხულობს.
ვიდეოკლიპის ავტორი Mechanical Rainbow-ს წევრი დადუ დონაძეა. კლიპი სწორედ ჯგუფისთვის დამახასიათებელ ესთეტიკას ატარებს. გამოსვლიდან ერთ დღეში „შორენა, ნათია, მზიას” იუთუბზე 10 000-მდე ნახვა აქვს. სტეფანეს სხვა ნამუშევრების მსგავსად, სიმღერა უკვე იქცა ჰიტად და სრულად მოიცვა სოციალური ქსელები.
გუშინვე კორძიმ სტეფანესა და Mechanical Rainbow-სთან ერთად კიდევ ერთი ახალი სიმღერა დააანონსა – „მახსოვს”, რომელიც 11 ივნისს გამოვა.
