2023 წელს The Beatles-მა ხელოვნური ინტელექტის გამოყენებით ლეგენდარული ოთხეულის „გაცოცხლება“ მოახერხა და გრემის მფლობელი კომპოზიცია Now and Then გამოუშვა. ეს უკანასკნელი ბენდის ბოლო სიმღერად ითვლება. ორ წელიწადში კი ჯონ ლენონის, პოლ მაკარტნისა და რინგო სტარის ვაჟები: შონ ონო ლენონი, ჯეიმს მაკარტნი და ზაკ სტარკი ახალი სიმღერის გამოცემისთვის გაერთიანდნენ.
ეს კოლაბორაცია ბენდ Mantra of the Cosmos-ის მოახლოებული სინგლის, Rip Off-ის მეშვეობით მოხდება, რომლის ნაწყვეტიც ზაკ სტარკიმ 15 ივნისს ინსტაგრამზე გააზიარა. Mantra of the Cosmos ახალი ჯგუფია, რომელიც ზაკ სტარკიმ Happy Mondays-ის წევრებთან – შონ რაიდერთან, ბეზთან და Ride-ის ენდი ბელთან ერთად შექმნა. სიმღერა Rip Off-ისთვის ვოკალს მონაცვლეობით შონ ონო ლენონი, ჯეიმს მაკარტნი და შონ რაიდერი ასრულებენ.
როგორც ზაკ სტარკიმ The Telegraph-თან საუბარში აღნიშნა, პროექტი არ წარმოადგენს The Beatles-ის ერთგვარ დაბრუნებას.
„არა, ასე არ არის. ეს Mantra of the Cosmos-ია, უბრალოდ ისინი მონაწილეობენ.“ – აღნიშნა მან, როცა საუბარი მამების ბენდთან მსგავსებას შეეხო.
შონ ონო ლენონი 1975 წელს დაიბადა, ის ჯონ ლენონის და იოკო ონოს ქორწინებიდან ერთადერთი შვილია. თავისი მუსიკალური კარიერის განმავლობაში შონმა ისეთ არტისტებთან ითანამშრომლა, როგორებიც არიან ლანა დელ რეი, The Lemon Twigs და Fat White Family. პოლ მაკარტნისა და ლინდა მაკარტნის შვილი ჯეიმსი 1977 წელს დაიბადა. ის სოლო კარიერას გაჰყვა, 2024 წელს კი შონთან ერთად სიმღერა Primrose Hill გამოსცა.
ჯეიმს მაკარტნიმ 2012 წელს BBC-სთან საუბარში აღნიშნა, რომ თავდაპირველად ჯგუფის შექმნის იდეა შონთან, დჰანი ჰარისონთან და ზაკ სტარკისთან ერთად „განიხილებოდა“. ახალი პროექტი კი პირველი შემთხვევაა, როცა The Beatles-ის წევრების შვილები ერთობლივ საავტორო მუსიკაზე მუშაობენ.
აღსანიშნავია, რომ ცოტა ხნის წინ ზაკ სტარკიმ ნოელ გალაგერთან სინგლ Domino Bones-ზე ითანამშრომლა. ნოელმა აღნიშნა, რომ სიმღერის შექმნა ბობ დილანმა, სალვადორ დალიმ და ალენ გინსბერგმა შთააგონეს.
ბოლო ხანებში ზაკ სტარკი ბენდ The Who-ს დრამერი იყო, თუმცა ის ჯგუფიდან ორჯერ დაითხოვეს. ზაკმა ასევე უარი განაცხადა Oasis-ის განახლებულ ბენდში დაბრუნებაზე, სადაც იგი 2004-2008 წლებში დრამზე უკრავდა.
