ნიკ კეივისა და მორისის თანამშრომლობაზე ფანების იმედი საბოლოოდ ჩამოიშალა. კეივმა გაამხილა, რომ გასულ წელს ამ შესაძლებლობაზე უარი თავად თქვა.
კეივმა თავის ვებგვერდზე ერთ-ერთ გულშემატკივარს უპასუხა, რომელიც მომღერალს ეკითხებოდა, შეხვედრია თუ არა ოდესმე The Smiths-ის ყოფილ ვოკალისტს.
კეივმა, რომელმაც მორისი შეაფასა, როგორც „კომპლექსური და გამხლეჩი ფიგურა, რომელიც დიდ სიამოვნებას იღებს სხვების წყობიდან გამოყვანით” და ასევე „მისი თაობის საუკეთესო ლირიცისტი”, აღნიშნა, რომ მას არასდროს ჰქონია მორისისთან გადაკვეთა და ალბათ სწორედ ამიტომაც რჩება მის ფანად.
თუმცა კეივმა ასევე დაამატა, რომ მორისი მას 2024 წელს მეილით დაუკავშირდა და მისი სიმღერის შესრულება შესთავაზა. „სიამოვნებით გავაკეთებდი ამას, მაგრამ საკმაოდ ლამაზი სიმღერა, რომელიც მან გამომიგზავნა, იწყებოდა ხანგრძლივი და სრულიად შეუსაბამო ბუზუკის ინტროთი,” – დაწერა კეივმა. „თანაც, მას რეალურად ის კი არ სურდა, რომ მემღერა, არამედ ბუზუკის ფონზე შემესრულებინა სრულიად არასაჭირო, პროვოკაციული და სულელური ანტივოუკ ტექსტი, რომელიც მან დაწერა.”
კეივს ტექსტის შინაარსთან დაკავშირებით სხვა დეტალები არ დაუკონკრეტებია, თუმცა, მისი თქმით, ეს საკმარისი აღმოჩნდა, რომ შემოთავაზებაზე „თავაზიანად უარი ეთქვა.”
„მიუხედავად იმისა, რომ შეიძლება რაღაც დონეზე სენტიმენტებს ვეთანხმებოდი, ეს არ არის ჩემი სტილი. ვცდილობ, პოლიტიკა, კულტურული თუ სხვაგვარი, ჩემი მუსიკისგან გავმიჯნო. ვფიქრობ, ეს აკნინებს მნიშვნელობას და არაეთიკურია იმ მიზნებთან მიმართებით, რის მიღწევასაც ვცდილობ.”
მორისის ბოლო ალბომი I Am Not a Dog on a Chain 2020 წელს გამოვიდა. ნოემბერში მომღერალი ამბობდა, რომ მის მიერ გაკეთებული საკამათო განცხადებების გამო მისი გამოუცემელი ალბომი Bonfire of Teenagers თაროზეა შემოდებული.
„როგორც იცით, ამიერიდან აღარავინ გამოსცემს ჩემს მუსიკას,” – უთხრა მორისიმ გულშემატკივარს ნიუ-ჯერსიში. „რადგან მე გამოხატვის თავისუფლების მთავარი დამცველი ვარ. მინიმუმ ინგლისში კი ეს ახლა კრიმინალია.”
