ვერასდროს განსაზღვრავ, როდის რომელი ძველი სიმღერა ამოტივტივდება და ახალ სიცოცხლეს დაიწყებს. ხანდახან ამას ცხადი მიზეზი აქვს, მაგალითად, მისი ფილმსა თუ სატელევიზიო შოუში გამოყენება, როგორც ეს მოხდა კეიტ ბუშის Running Up That Hill (A Deal With God)-ის შემთხვევაში, რომელიც Stranger Things-ის მეოთხე სეზონში გაჟღერდა, ან თუნდაც „ნირვანას” Something in the Way, რომელიც „ბეტმენის” გამოსვლის შემდეგ ხელახლა გაცოცხლდა.
სხვა შემთხვევებში ძველი სიმღერის ამოტივტივება შედარებით მოულოდნელია, მაგალითად, როცა Fleetwood Mac-ის Dreams ან Fetty Wap-ის Again დაბრუნდნენ Billboard Hot 100-ში ისეთი აპლიკაციების დახმარებით, როგორიცაა „ტიკტოკი”.
ბოლო ასეთი მაგალითი კი Coldplay-ს 25 წლის წინანდელი სიმღერა Sparks-ია.
სიმღერა 2000 წელს გამოვიდა ბენდის სადებიუტო ალბომში Parachutes. 25 წლის შემდეგ კი პირველად მოხვდა Hot 100-ში (93-ე ადგილზე). მის მიმართ ინტერესი კი მას შემდეგ განახლდა, რაც ის ბოლო დროს „ტიკტოკზე” გატრენდდა. ამას დაემატა გაზრდილი სტრიმები Coldplay-ს ლას-ვეგასის 6 და 7 ივნისის შოუების შემდეგ.
შოუები ემთხვევა ბენდის სოლისტის, კრის მარტინის დაშორებას ხანგრძლივ პარტნიორ დაკოტა ჯონსონთან. „ტიკტოკის” ერთ-ერთ პოპულარულ ვიდეოში, სადაც ბენდი Sparks-ს ასრულებს, მარტინი ძალიან ემოციური ჩანს შემდეგი ფრაზის შესრულებისას: And I know I was wrong/ But I won’t let you down. ამ მომენტმა ფანებზე დიდი შთაბეჭდილება მოახდინა და მას შემდეგ სიმღერა „ტიკტოკის” 500 000-ზე მეტი ვიდეოს საუნდტრეკი გახდა.
@diana2rad_ Homie is heartbroken 😭💔 #coldplaylasvegas #alliegantstadium #coldplayconcert #sparkscoldplay #chrisanddakota #dakotajohnson #chrismartin #chrismartincoldplay #coldplayconcert #coldplayjune6 #fypシ #foryoupage #foryoupage❤️❤️ #coldplaylasvegas2025 #alligantstadiumcoldplay #chrismartinanddakotajohnson #fyp #coldplaysparks ♬ I know I was wrong – Diana🌙
გთავაზობთ სიმღერის აშშ-ის სტრიმების რაოდენობას კვირების მიხედვით:
- 23-29 მაისი: 3 მილიონი
- 30 მაისი-11 ივნისი: 3.2 მილიონი ( 5%-იანი ზრდა)
- 6-12 ივნისი: 4.8 მილიონი (48%-იანი ზრდა)
- 13-19 ივნისი: 5.7 მილიონი (18.5%-იანი ზრდა)
მიუხედავად იმისა, რომ Sparks არასდროს გამოსულა სინგლის სახით, ის დიდხანს იყო ფანების საყვარელი სიმღერა და ბენდის კონცერტების განუყოფელი ნაწილი. 2005 წელს სიმღერას მცირე აღმასვლა ჰქონდა მას შემდეგ, რაც ფილმ Wedding Crashers-ში გაჟღერდა. 2020 წელს კი Billboard-ის სარედაქციო გუნდმა ის 2000 წლის ერთ-ერთ საუკეთესო სიმღერად დაასახელა.
Sparks-ის დამსახურებით სარგებელი ნახა თავად ალბომმაც. Parachutes კიდევ ერთხელ მოხვდა Billboard 200-ში (169-ე ადგილზე). თავდაპირველად ალბომი ჩარტში 2001 წელს 51-ე ადგილით შევიდა, ბოლოს კი 2016 წელს მოხვდა.
Sparks-მა Coldplay-ს Hot 100-ში ჯამში 27-ე შესვლა მოუტანა. ბოლოს ბენდი ჩარტში 2024 წლის ოქტომბერში შევიდა სიმღერით We Pray.
